جرمن فٹ بال کپ، پری کوارٹر فائنل مرحلے کا آغاز

بنڈس لیگا کے موسم خزاں کی چیمپئن ٹیم بائرن میونخ نے بوخم کی ٹیم کو ایک کے مقابلے میں دو گول سے شکست دے دی۔ بنڈس لیگا کے رواں سیزن میں عمدہ کارکردگی دکھانے والی ٹیم میونخ کے لیے یہ میچ آسان ثابت نہ ہوا۔ اس میچ میں بوخم کے کھلاڑیوں نے اچھا کھیل پیش کیا اور یہ مقابلہ آخری لمحات تک ایک ایک گول سے برابر تھا کہ آخری منٹ میں Arjen Robben نے گول کر کے میونخ کو جیت دلوا دی۔

اس میچ میں بوخم کی طرف سے Federico نے چھبیسویں منٹ میں گول کر کے اپنی ٹیم کو برتری دلوائی، جو ٹونی کراؤس نے 52 ویں منٹ میں ختم کی۔ اس کے بعد دونوں ٹیموں نے ایک دوسرے کی گول پوسٹوں پر کئی جاندار حملے کیے لیکن کوئی گول نہ ہو سکا۔ تب یوں معلوم ہو رہا تھا کہ یہ میچ اضافی وقت میں چلا جائے گا لیکن کھیل کے 91 ویں منٹ میں روبن نے گول داغ دیا اور اپنی ٹیم کو کوارٹر فائنل مرحلے میں داخل کرنے میں اہم کردار ادا کیا۔

جرمن کپ کے سلسلے میں منگل کو کھیلے گئے ایک اور اہم میچ میں بنڈس لیگا کی دفاعی چیمپئن ٹیم ڈورٹمنڈ نے ایک صحت مند مقابلے کے بعد ڈسلڈورف کی ٹیم کو پنلٹی شوٹ آؤٹ پر شکست دی۔ ڈورٹمنڈ کی ٹیم نے اس میچ میں قریب ایک گھنٹے تک دس کھلاڑیوں سے ڈسلڈورف کا مقابلہ کیا۔ یہ میچ اضافی وقت میں بھی گیا لیکن دونوں ٹیمیں کوئی گول نہ کر سکیں۔ جب پنلٹی شوٹ آؤٹ کا وقت آیا تو ڈورٹمنڈ نے یہ مقابلہ چار کے مقابلے میں پانچ گول سے جیت لیا۔

منگل کو کھیلے گئے دیگر دو میچوں میں نیورمبرگ نے بنڈس لیگا کے درجہ دوم میں شامل ٹیم Greuther Fuerth کو ایک صفر سے مات دی جبکہ ہوفن ہائم نے آؤگسبرگ کو ایک کے مقابلے میں دو گول سے ہرا دیا۔ جرمن کپ کے کوارٹر فائنل تک رسائی حاصل کرنے والی یہ چار پہلی ٹیمیں ہیں۔

آج یعنی بدھ کو جرمن کپ میں تیسرے مرحلے یا پری کوارٹر فائنل کے مقابلوں میں مزید چار میچ کھیلے جا رہے ہیں۔ ان میں برلن کی ٹیم کائزرز لاؤٹرن کے مد مقابل ہو گی، مائنز اور کِیل ایک دوسرے کے ساتھ پنجہ آزمائی کریں گے، اشٹٹ گارٹ اور ہیمبرگ کے مابین بھی ایک میچ کھیلا جائے گا جبکہ مؤنشن گلاڈ باخ کی ٹیم جرمن کپ کی دفاعی چیمپئن شالکے کے مقابلے میں میدان میں اترے گی۔

رپورٹ: عاطف بلوچ

ادارت: مقبول ملک