غزہ میں اسرائیلی فضائی حملے میں پانچ صحافی ہلاک

القدس ٹوڈے کی جانب سے جاری کردہ ایک بیان کے مطابق صحافیوں کی نشریاتی ویگن کو اس وقت ایک میزائل سے نشانہ بنایا گیا جب وہ وسطی غزہ پٹی میں نصیرات پناہ گزین کیمپ میں موجود تھی۔

القدس ٹوڈے عسکریت پسندفلسطینی تنظیم جہاد اسلامی سے وابستہ ہے، جس کے عسکریت پسندوں نے غزہ پٹی میں حماس کے شانہ بشانہ لڑائی لڑی اور سات اکتوبر 2023 کو اسرائیل میں کیے گئے دہشت گردانہ حملے میں بھی حصہ لیا تھا، جو غزہ پٹی کی موجودہ جنگ کا سبب بنا تھا۔

جنگ بندی معاہدے میں تاخیر، حماس اور اسرائیل کے ایک دوسرے پر الزام

اسرائیل کا حماس رہنما اسماعیل ہنیہ کو ہلاک کرنے کا اعتراف

اس چینل کی طرف سے اپنے ہلاک ہونے والے پانچوں کارکنوں کی شناخت فیصل ابو القمسان، ایمن الجدی، ابراہیم الشیخ خلیل، فادی حسونا اور محمد اللادا کے طور پر کی گئی ہے۔

القدس ٹوڈے کی طرف سے جاری ہونے والے بیان میں کہا گیا ہے کہ یہ ارکان ''اپنی صحافتی اور انسانی ذمہ داریاں نبھاتے ہوئے‘‘ مارے گئے۔

بیان میں مزید کہا گیا ہے، ''ہم اپنے مزاحمتی میڈیا پیغام کو جاری رکھنے کے عزم کا اعادہ کرتے ہیں۔‘‘

اسرائیلی فوج نے اپنے بیان میں کہا ہے کہ اس نے نصیرات کے علاقے میں جہاد اسلامی کے ایک 'دہشت گرد سیل‘ کی گاڑی کو نشانہ بنایا۔ بیان میں مزید کہا گیا ہے، ''حملے سے قبل شہریوں کو نقصان پہنچنے کے خطرے کو کم کرنے کے لیے متعدد اقدامات کیے گئے۔‘‘

نصیرات میں عینی شاہدین کے مطابق اسرائیلی طیارے کی جانب سے داغے گئے میزائل نے الودہ ہسپتال کے باہر کھڑی براڈکاسٹ گاڑی کو نشانہ بنایا، جس کے نتیجے میں گاڑی میں آگ لگ گئی اور اندر موجود افراد ہلاک ہو گئے۔

صحافیوں کے تحفظ کے لیے کام کرنے والی تنظیم 'کمیٹی ٹو پروٹیکٹ جرنلسٹس‘ کی مڈل ایسٹ شاخ نے کہا ہے کہ یہ تنظیم ان اطلاعات پر شدید افسردہ ہے کہ اسرائیلی حملے میں پانچ صحافی اور میڈیا ورکرز اپنی نشریاتی گاڑی کے اندر ہلاک ہو گئے۔

سوشل میڈیا پر جاری کردہ ایک بیان میں کہا گیا ہے، ''صحافی عام شہری ہیں اور ان کا ہمیشہ تحفظ کیا جانا چاہیے۔‘‘

فلسطینی جرنلسٹس سنڈیکیٹ نے گزشتہ ہفتے کہا تھا کہ غزہ میں جنگ کے آغاز سے اب تک 190 سے زائد صحافی ہلاک اور کم از کم 400 زخمی ہو چکے ہیں۔

خبر رساں ادارے اے ایف پی کے مطابق گزشتہ برس سات اکتوبر کو حماس کی زیر قیادت اسرائیل میں ہونے والے دہشت گردانہ حملے کے نتیجے میں 1208 افراد ہلاک ہوئے تھے جن میں زیادہ تر عام شہری تھے، جبکہ 250 کے قریب افراد کو یرغمال بنا کر غزہ پٹی لے جایا گیا تھا۔

اس حملے کے بعد اسرائیل کی جانب سے غزہ پٹی میں حماس کے خلاف ملٹری آپریشن شروع کر دیا گیا تھا جو اب تک جاری ہے۔

غزہ کی وزارت صحت کے اعداد و شمار کے مطابق اسرائیل فوجی کارروائی کے نتیجے میں غزہ پٹی میں کم از کم 45,361 افراد ہلاک ہو چکے ہیں، جن میں سے اکثریت عام فلسطینی شہریوں کی تھی۔

ا ب ا/م م، ر ب (اے ایف پی، اے پی)