منڈیلا کو آج سپرد خاک کیا جائے گا

آخری رسومات کے لیے کونو روانہ کرنے سے قبل ہفتے کی صبح نیلسن منڈیلا کی میت کو ایک الوداعی تقریب کے لیے واٹر کلوف کی چھاؤنی منتقل کیا گیا۔ یہ تقریب خصوصی طور پر افریقی نیشنل کانگریس’ اے این سی‘ کے لیے منعقد کی گئی تھی۔ فوج نے جنوبی افریقی پرچم میں لپٹے ہوئے کفن کو اے این سی کے حوالے کیا۔ واٹر کلوف ہوائی اڈے پر ہونے والی تقریب میں جنوبی افریقہ کے صدر جیکب زوما نے ایک مرتبہ پھر نسلی امتیاز کے خلاف منڈیلا کی جدوجہد کو یاد کیا۔ انہوں نے کہا کہ نظریے کو عملی شکل دینا صرف منڈیلا کی ہی خصوصیت تھی۔ زوما کے بقول منڈیلا ایک دور دراز علاقے سے جوہانسبرگ آئے اور نسلی امتیاز کے خاتمے کے لیے اپنے ساتھ نظم و ضبط اور نظریہ بھی لائے۔ اس کے بعد ہفتے کی صبح ہی منڈیلا کی میت کودوبارہ فوج کے حوالے کیا گیا، جہاں سے اسے کونو روانہ کر دیا گیا ہے۔

مقامی وقت کے مطابق مینڈیلا کی میت دوپہر کو ایسٹرن کیپ پہنچی۔ ہوائی اڈے سے مقررہ مقام تک جانے والے راستے کے اردگرد لوگوں کی ایک بڑی تعداد اپنے رہنما کو خراج عقیدت پیش کرنے کے لیے موجود تھی۔ آج بروز اتوار کونو میں ہی نوبل امن انعام یافتہ منڈیلا کو سپردِ خاک کر دیا جائے گا۔ ذرائع کے مطابق دارالحکومت پریٹوریا میں تین روز کے دوران ایک لاکھ سے زائد افراد نے نیلسن منڈیلا کا آخری دیدار کیا۔ اس دوران عوام کی ایک بڑی تعداد نے مایوسی کا اظہار کیا ہے کہ ٹریفک کے مسائل کی وجہ سے وہ اپنے رہنما کو آخری مرتبہ نہ دیکھ پائے۔

جنوبی افریقہ میں امن کی علامت سمجھے جانے والے آرچ بشپ ڈیسمنڈ ٹوٹو اپنے دوست نیلسن منڈیلا کی آخری رسومات میں شرکت نہیں کر سکیں گے۔ منڈیلا کی بیٹی کے مطابق ٹوٹو اُن کلیسائی نمائندوں میں شامل نہیں، جنہیں اس تقریب میں شرکت کی باقاعدہ دعوت دی گئی ہے۔ ذرائع ابلاغ کی رپورٹوں کے مطابق افریقن نیشنل کانگریس اے این سی کی وجہ سے ٹوٹو کو اس فہرست سے باہر رکھا گیا ہے۔ ٹوٹو کے معاون روجر فریڈمین نے اس صورتحال پر تبصرے کرنے سے گریز کرتے ہوئے صرف اتنا کہا کہ ٹوٹو کا ابھی تک آخری رسومات میں شرکت کرنے کا کوئی ارادہ نہیں۔

ڈیسمنڈ ٹوٹو کھل کر صدر جیکب زوما کی انتظامیہ کو تنقید کا نشانہ بھی بناتے رہتے ہیں۔ گزشتہ جمعرات کو جوہانسبرگ کے فٹ بال اسٹیڈیم میں ہونے والی تعزیتی تقریب میں بھی اُنہیں مدعو نہیں کیا گیا تھا۔ اُنہیں اسٹیج پر صرف اس وقت بلایا گیا، جب اسٹیڈیم میں صرف چند لوگ باقی بچے تھے۔ 1990ء میں رہائی کے بعد نیلسن منڈیلا نے اپنی پہلی شب ٹوٹو کے ہی گھر بسر کی تھی۔ حالیہ برسوں کےدوران یہ دونوں انتہائی قریبی رابطے میں رہے۔