پاکستان کا نگران وزیراعظم کون، معاملہ اب الیکشن کمیشن کے پاس

پاکستان کے دستور کے مطابق اب الیکشن کمیشن آف پاکستان اگلے دو روز کے اندر نگران وزیراعظم کے نام کا اعلان کر دے گا۔ واضح رہے کہ پاکستان میں رواں برس مئی میں پارلیمانی انتخابات کا انعقاد ہونا ہے اور یہ پہلا موقع ہے کہ ملک میں کسی منتخب حکومت نے اپنی دستوری معیاد پوری کی ہے۔

آٹھ رکنی پارلیمانی کمیٹی نے سابق وزیراعظم اور قائد حزب اختلاف کے درمیان کسی نگران وزیراعظم کے نام پر متفق نہ ہونے کے بعد بدھ کے روز سے اپنی اپنی جماعتوں کے نامزد امیدواروں کے ناموں پر غور اور کسی ایک کی نامزدگی کے لیے مذاکرات شروع کیے تھے۔ تین روز تک جاری رہنے والے ان مذاکرات میں شریک دیگر ارکان کے ہمراہ سابق حکمران جماعت پاکستان پیپلز پارٹی کی نمائندگی کرنے والے رہنما اور سابق وزیر برائے مذہبی امور خورشید احمد شاہ نے کہا، ’اس طرز کا یہ پہلا تجربہ تھا۔ کمیٹی نے پوری دیانتداری سے کوشش کی تاہم بدقسمتی سے ہم کامیاب نہ ہو سکے۔‘

واضح رہے کہ پارلیمانی کمیٹی کے اجلاس میں حکومت اور اپوزیشن کی جانب سے دو دو نام تجویز کیے گئے ہیں، تاہم یہ کمیٹی کسی ایک نام پر متفق نہ ہو پائی۔

اب حکومت اور اپوزیشن کی جانب سے تجویز کردہ یہ چاروں نام الیکشن کمیشن آف پاکستان کے پاس چلے گئے ہیں، جو ان میں سے کسی ایک نام کا اعلان اگلے دو روز میں کرنے کا پابند ہے۔ الیکشن کمیشن نے جمعے کے روز آئندہ عام انتخابات کے الیکشن شیڈول کا اعلان بھی کر دیا ہے اعلان کیا ہے۔

واضح رہے کہ پیپلز پارٹی کی قیادت میں حکمران اتحاد پاکستان کی تاریخ میں پہلی مرتبہ پانچ سالہ حکومت کی مدت مکمل کرنے میں کامیاب رہا ہے۔ اس سے قبل ملک میں فوجی بغاوتوں اور طویل آمریتوں کی ایک طویل تاریخ موجود ہے۔ جمعے ہی کے روز سابق فوجی سربراہ اور صدر پرویز مشرف کی جانب سے بھی اعلان کیا گیا ہے کہ وہ اپنی خودساختہ جلاوطنی ختم کر کے آئندہ انتخابات میں شرکت کے لیے وطن واپس لوٹ رہے ہیں۔

at/ab (dpa)