اسرائیل کو ’ٹھنڈا‘ کرنے کی امریکی کوشش

باراک اوباما نے چھ عالمی طاقتوں اور ایران کے مابین معاہدے کے بعد اتوار کو اسرائیلی وزیر اعظم بینجمن نیتن یاہو سے ٹیلی فون پر بات کی ہے۔ خبر رساں ادارے ڈی پی اے کے مطابق وائٹ ہاؤس نے اس ٹیلی فونک گفتگو سے متعلق ایک بیان جاری کیا ہے جس کے مطابق اوباما نے زور دیا ہے کہ امریکا اسرائیل کے ساتھ تعلقات مضبوطی سے قائم رکھے گا۔

اوباما نے یہ بھی تسلیم کیا کہ ایران کے ارادوں پر شک کے لیے اسرائیل کی وجہ جائز ہے۔ وائٹ ہاؤس کے بیان کے مطابق اوباما نے تصدیق کی ہے کہ وہ جامع حل تک پہنچنے کے لیے مذاکرات کی کوششوں کے تناظر میں امریکا اور اسرائیل کے درمیان مشاورت کا عمل فوری شروع کرنے کے خواہاں ہے۔‘‘

عالمی طاقتوں کے ساتھ معاہدے کے نتیجے میں ایران یورینیئم کی افزودگی پانچ فیصد کی سطح تک محدود رکھے گا۔ اس کے بدلے میں اس پر عائد پابندیاں ہٹائی جائیں گی۔ توقع ہے کہ اس سے ایرانی معیشت کو سات بلین ڈالر کا فائدہ ہو گا۔

معاشی تناظر میں عالمی منڈیوں پر اس معاہدے کے فوری اثرات بھی ظاہر ہونا شروع ہو گئے ہیں۔ اس کے بعد عالمی مارکیٹ میں خام تیل کی قیمت میں دو ڈالر فی بیرل کمی ریکارڈ کی گئی ہے۔ اس کے ساتھ ہی جاپان اور آسٹریلیا کے بازار حصص میں تیزی دیکھی جا رہی ہے۔

جہاں اسرائیل نے اس معاہدے پر کڑی تنقید کی وہیں بیشتر عالمی رہنماؤں نے اس کا خیر مقدم کیا۔ جرمن وزیر خارجہ گیڈو ویسٹر ویلے نے کہا: ’’ہمیں آئندہ مہینوں کو باہمی اعتماد کی فضاء قائم کرنے کے لیے استعمال کرنا ہو گا۔‘‘

جرمن وزیر خارجہ نے مزید کہا کہ اس معاہدے کو شفاف اور قابلِ تصدیق انداز سے نافذ کیا جانا چاہیے۔ واضح رہے کہ جرمنی ’پی فائیو پلس وَن‘ گروپ کا حصہ ہے جس میں اس کے علاوہ اقوام متحدہ کی سلامتی کونسل کے پانچ مستقل ارکان امریکا، فرانس، برطانیہ، روس اور چین ہیں۔

ایران کا یہ معاہدہ اسی گروپ کے ساتھ بات چیت کے نتیجے میں طے پایا ہے۔ برطانیہ اور فرانس نے کہا ہے کہ وہ اس معاہدے کو کامیاب ہوتے ہوئے دیکھنا چاہتے ہیں۔ روس نے بھی اس کا خیر مقدم کیا ہے جبکہ چین کا کہنا ہے کہ اس سے بین الاقوامی جوہری عدم پھیلاؤ کے نظام کو برقرار رکھنے کے ساتھ ساتھ مشرقِ وسطیٰ میں استحکام کے فروغ میں مدد ملے گی۔