افغان طالبان کی سفارتی تنہائی ختم ہونے کو ہے؟

جرمن نیوز ایجنسی ڈی پی اے کے مطابق بند دروازوں کے پیچھے ہونے والی اس کانفرنس کا آغاز اتوار کو ہوا تھا اور اس کا اولین مقصد طالبان حکومت کے ساتھ بین الاقوامی روابط کو مضبوط بنانا ہے۔ افغان طالبان کے اقتدار میں آنے کے بعد ایسا پہلی مرتبہ ہوا ہے کہ مغربی ممالک کے ساتھ ہونے والی کسی اعلیٰ سطحی کانفرنس میں کابل حکومت کاکوئی وفد بھی شامل ہوا ہے۔

طالبان کے وفد کی قیادت کابل حکومت کے ترجمان ذبیح اللہ مجاہد کر رہے ہیں اور اس وفد نے مرکزی کانفرنس سے قبل روس، بھارت اور سعودی عرب جیسے ممالک کے نمائندوں سے ابتدائی بات چیت کی۔ طالبان کی طرف سے جاری کردہ ایک بیان کے مطابق سعودی عرب نے اس بات کی یقین دہانی کرائی ہے کہ ریاض حکومت کابل میں اپنا سفارت خانہ دوبارہ کھولنے پر غور کر رہی ہے۔ تاہم اس حوالے سے سعودی عرب کا کوئی باقاعدہ بیان سامنے نہیں آیا۔

افغان میڈیا کو حاصل ہونے والی اس میٹنگ کے ایجنڈے کی  ایک نقل کے مطابق مرکزی کانفرنس میں اقوام متحدہ کی انڈر سیکرٹری جنرل روزمیری ڈی کارلو اور قطری وفد کے سربراہ نے ابتدائی تقاریر کیں اور اس کے بعد طالبان کے وفد کو خطاب کا موقع دیا گیا۔ اجلاس کے دوسرے دن افغانستان میں نجی شعبے اور انسداد منشیات کی کوششوں کے بارے میں بات چیت پر توجہ مرکوز کی جائے گی۔

طالبان حکومت کے ساتھ سفارتی روابط کا آغاز؟

ذبیح اللہ مجاہد نے اس کانفرنس کو افغانستان اور عالمی برادری کے لیے مشترکہ بنیاد تلاش کرنے کا ایک موقع قرار دیا ہے۔

دریں اثنا اقوام متحدہ کے ایک ترجمان نے اپنا نام ظاہر نہ کرنے کی شرط پر نیوز ایجنسی اے ایف پی کو بتایا، ''اقوام متحدہ کے اجلاس کے ساتھ ساتھ بہت سے خصوصی ایلچی طالبان کے نمائندوں کے ساتھ الگ سے بات چیت شروع کرنے کے لیے تیار ہیں۔‘‘

دوسری جانب طالبان نے ملک میں خواتین کی آزادی اور لڑکیوں کی تعلیم کے حوالے سے سخت پابندیاں عائد کر رکھی ہیں اور اسی وجہ سے مغربی ممالک افغانستان کی موجودہ حکومت کو متعدد مرتبہ شدید تنقید کا نشانہ بنا چکے ہیں۔ ایمنسٹی انٹرنیشنل کے سربراہ اگنیس کالمارڈ نے مذاکرات سے قبل ایک بیان میں کہا، ''مذاکرات میں طالبان کی شرکت کو یقینی بنانے اور ان کی شرائط پر عمل کرنے سے طالبان کے صنفی بنیاد پر ادارہ جاتی نظام کو قانونی حیثیت حاصل ہو جانے کا خطرہ ہو گا۔‘‘

افغان طالبان خود کو افغان عوام کا واحد نمائندہ سمجھتے ہیں اور اسی لیے وہ بین الاقوامی کانفرنسوں میں خواتین سمیت دیگر افغان گروپوں کی شرکت کو سختی سے مسترد کرتے ہیں۔

تاہم اقوام متحدہ کے حکام کہنا ہے کہ دوحہ کے تمام مذاکرات کے دوران ان کی توجہ خواتین اور لڑکیوں کے تحفظات، عمومی طور پر انسانی حقوق اور افغانستان کے اندر تمام گروہوں کی ملکی سیاست میں شمولیت کی اہمیت پر مرکوز رہے گی۔

اس کانفرنس کے آغاز سے پہلے اقوام متحدہ کی انڈر سیکرٹری جنرل روزمیری ڈی کارلو نے کہا کہ اقوام متحدہ کا حتمی مقصد ایک پرامن اور مستحکم افغانستان ہے، جو بین الاقوامی برادری میں شامل ہو اور انسانی حقوق سے متعلق اپنے وعدوں کو پورا کرے، خاص طور پر خواتین اور لڑکیوں کے حقوق کو۔

افغانستان کے بینکنگ ذخائر مغربی ممالک میں منجمد ہیں اور طالبان کے متعدد سینئر رہنما ابھی تک امریکہ کو مطلوب افراد کی فہرست میں شامل ہیں۔

تاہم حالیہ کچھ عرصے میں تبدیلی کے اشارے بھی ملے ہیں۔ اقوام متحدہ نے طالبان کے چند مرکزی رہنماؤں پر عائد سفری پابندیاں نرم کی ہیں جبکہ یورپی یونین نے بھی افغانستان کے لیے انسانی ہمدردی کی بنیاد پر ایک امدادی پیکج کا اعلان کیا ہے۔ اس سے ظاہر ہوتا ہے کہ طالبان حکومت اور افغانستان کے حوالے سے موجودہ بین الاقوامی موقف میں نرمی پیدا ہوتی جا رہی ہے۔

ا ا / م م (ڈی پی اے، اے ایف پی)