اپیل مسترد، گیلانی پھر عدالت میں پیش ہوں گے

چیف جسٹس افتخار محمد چوہدری کی سربراہی میں سپریم کورٹ کے آٹھ رکنی بینچ نے وزیراعظم اس اپیل کی سماعت کی۔ عدالت نے پہلے ہی گیلانی پر 13 فروری کو توہین عدالت کے الزامات کے حوالے سے فرد جرم عائد کرنے کا اعلان کر رکھا ہے۔

پاکستانی وزیراعظم یوسف رضا گیلانی کے وکیل اعتزاز احسن نے جمعے کو مقدمے کی سماعت کے دوران اپنے اختتامی دلائل میں کہا کہ ان کے مؤکل کا کبھی بھی توہین عدالت کا ارادہ نہیں رہا۔ انہوں نے کہا کہ وزیراعظم نے صدر آصف علی زرداری کے خلاف سوئس عدالتوں میں بدعنوانی کے مقدمات دوبارہ کھولنے کے لیے قواعد و ضوابط پر عمل کرتے ہوئے خط نہیں لکھا۔ یہ قواعد و ضوابط آئین کے مطابق ہیں اور اگر ان پر عمل نہ کیا جائے تو وزیراعظم کو سزا بھی ہو سکتی ہے۔ اعتزاز احسن کا یہ بھی کہنا تھا کہ وزیراعظم پر فرد جرم عائد کرنے کا فیصلہ سنانے والے بینچ نے اس کی وجوہات نہیں بتائیں۔

اعتزاز احسن کے دلائل مکمل ہونے کے بعد عدالت نے اپنے مختصر فیصلے میں کہا کہ وزیراعظم کے وکیل عدالت کو مطمئن نہیں کر سکے اور عدالتی حکم عدولی کے الزام پر ان پر فردجرم عائد کی جائے گی۔

فیصلہ آنے کے بعد اعتزاز احسن نے ذرائع ابلاغ سے مختصر گفتگو میں کہا کہ وزیراعظم 13 فروری بروز پیر عدالت میں پیش ہں گے جہاں ان پر فرد جرم عائد کی جائے گی۔

خیال رہے کہ سپریم کورٹ کے سات رکنی بینچ نے این آر او کیس پر عملدرآمد نہ کرنے کے الزام میں وزیراعظم کے خلاف توہین عدالت پر فرد جرم عائد کرنے کا فیصلہ کیا تھا۔ وزیراعظم کے وکیل اعتزاز احسن نے آٹھ  فروری کو انٹراکورٹ اپیل کے ذریعے اس فیصلے کو چیلنج کیا تاہم وہ دو روز تک دلائل دینے کے باوجود عدالت کو اپنے مؤکل کے خلاف توہین عدالت کی کارروائی ختم کرنے کے لیے قائل نہ کرسکے۔

قانونی ماہرین کے مطابق 13 فروری کو فرد جرم عائد کیے جانے کے وقت اگر وزیراعظم عدالت سے غیر مشروط معافی مانگ کر سوئس حکام کو خط لکھنے کی یقین دہانی کرا دیں تو ان کے خلاف توہین عدالت کی کارروائی ختم ہو سکتی ہے۔ بصورت دیگر اگر وزیراعظم نے ان الزامات سے انکار کرتے ہوئے اپنے دفاع کا فیصلہ کیا تو پھر وزیراعظم کے وکیل ان کے دفاع میں مقدمہ لڑیں گے۔

وزیراعظم پر الزام ثابت ہونے کی صورت میں انہیں جیل جانے کے علاوہ نا اہلی کا سامنا بھی کرنا پڑ سکتا ہے۔

رپورٹ: شکور رحیم، اسلام آباد

ادارت: ندیم گِل