تارکین وطن کی آمد: جرمن سرحدوں کی دوبارہ نگرانی شروع

جرمنی یورپی یونین کا سب سے زیادہ آبادی والا ملک ہے اور اس کا شمار دنیا کی بڑی معیشتوں میں ہوتا ہے۔ عام طور پر سمندری اور زمینی راستوں سے یورپ کا رخ کرنے والے مہاجرین اور تارکین وطن کی حتمی منزل جرمنی ہی ہوتا ہے۔

یورپی یونین کے سفراء مہاجرت اصلاحات معاہدے پر متفق

اب لیکن برلن حکومت نے ایک نئے منصوبے کے تحت خاص طور پر ملک کے جنوب میں سوئٹزرلینڈ کے ساتھ بین الاقوامی سرحد اور مشرق میں پولینڈ اور چیک جمہوریہ کے ساتھ بین الاقوامی سرحدوں کو پار کر کے آنے والے تارکین وطن کو روکنے کی خاطر اپنی سرحدوں کی نگرانی پھر شروع کر دی ہے۔

سرحد پر ہی پولیس چیکنگ

وفاقی جرمن وزیر داخلہ نینسی فیزر کا ارادہ تھا کہ برلن حکومت اب جرمنی کے ہمسایہ ان تینوں ممالک کے ساتھ اپنی سرحدوں پر نگرانی کے ایسے 'غیر منقولہ‘ انتظامات بحال کر دے، جن کے تحت وہاں سے ملک میں داخل ہونے والوں کی جرمن سرحدی پولیس موقع پر ہی چیکنگ بھی کر سکے۔

جرمنی، پولینڈ اور چیک جمہوریہ کا اضافی سرحدی چیکنگ پر تبادلہ خیال

اس طرح کی نگرانی جرمنی کی طرف سے جرمنی اور آسٹریا کی مشترکہ سر‌حد پر پہلے ہی کی جا رہی ہے، جو 2015ء میں شروع کی گئی تھی۔

برلن میں جرمن وزارت داخلہ کے جاری کردہ ایک بیان کے مطابق وزیر داخلہ نینسی فیزر نے کہا، ''اب یہ لازمی ہو گیا ہے کہ (انسانوں کی اسمگلنگ کرنے والوں کے) اس ظالمانہ کاروبار کے خلاف ہر طرح کے اقدامات کیے جائیں۔‘‘

تینوں ممالک میں سے کون کس معاہدے کا رکن

جرمنی کا ہمسایہ ملک سوئٹزرلینڈ یورپی یونین میں تو شامل نہیں مگر وہ یورپی یونین کے آزاد سرحدوں کے شینگن معاہدے میں شامل ہے۔ اس کے برعکس جرمنی کی طرح پولینڈ اور چیک جمہوریہ دونوں ہی یورپی یونین کے رکن ملک بھی ہیں اور شینگن زون  میں شامل ریاستیں بھی۔

مہاجرین اور پناہ گزینوں کے معاملے میں جرمنی کہاں کھڑا ہے؟

جرمنی نے اٹلی سے تارکین وطن لینے کا رضاکارانہ منصوبہ معطل کر دیا

شینگن زون میں شامل ممالک چونکہ اپنے شہریوں کو دیگر رکن ریاستوں میں آنے جانے کی بلا روک ٹوک اجازت دیتے ہیں اور زون کے رکن ممالک کی سرحدوں کی نگرانی شاذ و نادر ہی کی جاتی ہے، اس لیے شینگن زون کے کسی بھی حصے میں داخلی بین الاقوامی سرحدوں پر چیکنگ دوبارہ متعارف کرانے کے لیے یورپی کمیشن کو مطلع کرنا لازمی  ہوتا ہے۔

یورپی یونین کی ریاستیں کس طرح ہجرت کو روکنے کی کوشش کرتی ہیں

اسی لیے جرمن وزیر داخلہ نینسی فیزر نے کہا کہ اب یورپی کمیشن کو بھی باضابطہ طور پر مطلع کیا جا رہا ہے کہ جرمنی پیر 16 اکتوبر سے سوئٹزرلینڈ، چیک جمہوریہ اور پولینڈ کے ساتھ اپنی سرحدوں کی وہاں عبوری طور پر قائم کردہ پولیس چیک پوسٹوں کے ذریعے نگرانی دوبارہ شروع کر رہا ہے۔

مزدوروں کی پولینڈ اور ہنگری کی طرف نقل مکانی عروج پر

نئی سرحدی نگرانی زیادہ سے زیادہ صرف دو ماہ تک

جرمن وزارت داخلہ کے مطابق جرمنی کے مشرقی اور جنوبی ہمسایہ ممالک میں سے تین کے ساتھ سرحدوں کی دوبارہ نگرانی کا عمل آج 16 اکتوبر سے ابتدا میں صرف دس روز کے لیے شروع کیا گیا ہے۔ اس مدت میں توسیع کی تو جا سکتی ہے، تاہم اس کا زیادہ سے زیادہ ممکنہ عرصے صرف دو ماہ تک ہو سکتا ہے۔

ہنرمند تارکین وطن کی آمد، جرمنی میں نیا قانون منظور

وفاقی وزارت داخلہ نے یہ بھی کہا ہے کہ جرمنی اور آسٹریا کی مشترکہ سرحد کی پولیس کے ذریعے جو نگرانی پہلے ہی سے جاری ہے، اس کی موجودہ مدت 12 نومبر کو ختم ہونا ہے۔ تاہم یہ بات بھی طے کر لی گئی ہے کہ اس مدت میں بارہ نومبر سے مزید چھ ماہ کا اضافہ کر دیا جائے گا۔

جرمنی میں گزشتہ برس ستمبر سے لے کر اس سال ستمبر تک کے ایک سال کے عرصے میں پناہ کی درخواستیں دینے والوں کی تعداد ڈھائی لاکھ سے زیادہ رہی تھی، جو پورے 2022ء کے دوران دی جانے والی ایسی درخواستوں کی مجموعی تعداد سے بھی زیادہ بنتی ہے۔

م م / ک م (اے پی، اے ایف پی، ڈی پی اے)