سچن ٹنڈولکر کا کرکٹ سے ریٹائرمنٹ کا اعلان

سولہ سال کی عمر میں کرکٹ کا کیریئر شروع کرنے والے لٹل ماسٹر سچن ٹنڈولکر 24 برس تک کرکٹ کی دنیا میں ایک معتبر حوالے کے ساتھ موجود رہے۔ وہ اب تک 198 ٹیسٹ میچ کھیل چکے ہیں۔ انہوں نے ٹیسٹ کرکٹ میں 15 ہزار 837 رنز بنائے ہیں۔ اس میں ان کی 51 ٹیسٹ سینچریاں شامل ہیں۔ ایک روزہ میچوں میں انہوں نے 463 میچوں میں اپنے ملک بھارت کی نمائندگی کی اور اِن میچوں میں وہ 49 سینچریوں کے ساتھ 18 ہزار 426 رنز بنانے میں کامیاب رہے۔ کرکٹ کے مبصرین ٹنڈولکر کو ویسٹ انڈیز کے معروف بیٹسمین سر ویوین رچرڈ اور لیجنڈری سر ڈان بریڈمین کے ہم پلہ کھلاڑی قرار دییتے ہیں۔

ٹنڈولکر ایک روزہ میچوں سے پہلے ہی اپنی ریٹائرمنٹ کا اعلان کر چکے ہیں۔ اب انہوں نے ٹیسٹ کرکٹ کو بھی خیرباد کہنے کا فیصلہ کر لیا ہے۔ اس مناسبت سے انہوں نے اپنے فیصلے سے ذرائع ابلاغ کو آگاہ کرتے ہوئے کہا کہ انہوں نے تمام عمر کرکٹ کھیلی ہے اور گزشتہ چوبیس برس کرکٹ کھیلنے کے خواب کے ساتھ زندگی بسر کی ہے، اب اس کے بغیر زندگی کے روز و شب بہت ہی دشوار محسوس ہوں گے۔

ٹنڈولکر نے مزید کہا کہ یہ ان کے لیے بہت بڑا اعزاز ہے کہ وہ دنیا کے تقریباً ہر ٹیسٹ کھیلنے والے میدان میں اپنے ملک کی نمائندگی کر چکے ہیں۔ ٹنڈولکر کے مطابق دو سواں ٹیسٹ اپنے ہی ملک میں کھیل کر کرکٹ کو خیرباد کہنا بھی ایک اہم سنگ میل ہے۔

ٹیسٹ کرکٹ سے ریٹائرمنٹ کے اعلان کے بعد بھارت کے سابق اور موجودہ کھلاڑیوں کی جانب سے ٹنڈولکر کو شاندار الفاظ میں خراج تحسین پیش کرنے کا سلسلہ جاری ہے۔ بھارتی ٹیم کے سابق کپتان سارو گنگولی کے مطابق کرکٹ کے وہ مکمل ترین بیٹسمین ہیں اور وہ اس کھیل کے ہر انداز سے بخوبی آگاہ اور واقف ہیں۔

بھارت کے لیے پہلی مرتبہ ورلڈ کپ جیتنے والی ٹیم کے کپتان اور آل راؤنڈر کپل دیو نے ٹنڈولکر کو بھارت کے ابھرتے بیٹسمینوں کا آئیڈیل قرار دیا۔ کپل دیو کے مطابق کرکٹ سے وہ ریٹائر ہو رہے ہیں، یہ ضرور اداس کر دینے والی بات ہے لیکن ایک دن تو ہر کھلاڑی پر یہ وقت آتا ہے۔ ایک اور کھلاڑی سری کانت کے مطابق ٹنڈولکر کرکٹ کی دنیا میں ایک انسپریشن کا نام ہے۔

بھارت سے باہر بھی جہاں جہاں کرکٹ کھیلی جاتی ہے، وہاں سے بھی ٹنڈولکر کے لیے بھرپور انداز میں خراج تحسین پیش کیا جا رہا ہے۔ سری لنکا کے مشہور اسپنر مرلی دھرن کا کہنا ہے کہ دو سوویں ٹیسٹ میچ کے بعد کرکٹ کو خیرباد کہنا ایک عمدہ فیصلہ ہے اور امید کی جاتی ہے کہ وہ اپنے دو سوویں ٹیسٹ میچ کا اختتام بھی ایک شاندار سینچری پر کریں گے۔

انگلینڈ کرکٹ ٹیم کے سابق کپتان مائیکل وان ٹویٹر پر پیغام دیا کہ عظیم بیٹسمین نے کرکٹ کو خیرباد کہہ دیا ہے۔ جنوبی افریقی ٹیم کے موجودہ کپتان گریم اسمتھ کا کہنا ہے کہ سچن ایک شاندار کیریئر کے بعد کھیل کی دنیا سے جدا ہو رہے ہیں اور ایک طویل عرصے کے دوران وہ کسی اسکینڈل کا حصہ نہیں بنے جو ایک اور حیران کن بات ہے۔

انگلینڈ کے بیٹسمین کیون پیٹرسن نے کہا کہ سچن کرکٹ کی دنیا کا چیمپیئن کھلاڑی ہے۔ انگریز کھلاڑی اوئن مورگن نے اس خبر کو پریشان کن قرار دیا کہ سچن جیسے بڑے بیٹسمین نے کرکٹ سے ریٹائرمنٹ کا اعلان کر دیا ہے۔