سیلف ڈرائیونگ ٹیسٹ کار آپے سے باہر: ایک شخص ہلاک، نو زخمی

جرمن پولیس نے منگل سولہ اگست کے روز بتایا کہ یہ مہلک واقعہ پیر پندرہ اگست کی سہ پہر جنوب مغربی جرمن شہر روئٹلنگن میں اس وقت پیش آیا جب جرمنی کی دنیا بھر میں مشہور کار ساز کمپنی بی ایم ڈبلیو کی تیار کردہ ایک سیلف ڈرائیونگ کار ٹیسٹ ڈرائیونگ کے دوران ایک شاہراہ پر سفر میں تھی۔

بی ایم ڈبلیو کی نئی فیکٹری میں ساری بجلی قابل تجدید ذرائع سے

یہ کار BMW iX ماڈل کی ایک پوری طرح الیکٹرک کار تھی، جس میں پانچ افراد سوار تھے اور ان میں ایک بچہ بھی شامل تھا۔ روئٹلنگن پولیس کے مطابق یہ گاڑی دوران سفر ایک موڑ مڑتے ہوئے اپنی لین سے باہر نکل کر مخالف سمت سے آنے والی گاڑیوں سے ٹکرا کر کم از کم تین حادثات کا باعث بنی۔

پہلے اس بی ایم ڈبلیو نے سامنے سے آنے والی ایک سٹروئن گاڑی کو ٹکر ماری، جس کے بعد اس کا سٹروئن کے پیچھے آنے والی ایک مرسیڈیز گاڑی کے ساتھ براہ راست تصادم ہو گیا۔ اس حادثے کے نتیجے میں مرسیڈیز گاڑی میں بیٹھا ہوا ایک 33 سالہ شخص موقع پر ہی ہلاک جبکہ اس کا ڈرائیور زخمی ہو گیا۔

ٹیسلا کی الیکٹرک گاڑیوں کی فروخت میں ریکارڈ اضافہ

اسی دوران سیلف ڈرائیونگ بی ایم ڈبلیو نے جس سٹروئن گاڑی کو ٹکر ماری تھی، وہ بھی اس کے 70 سالہ ڈرائیور کے قابو سے باہر ہو کر ایک تیسری گاڑی سے جا ٹکرائی۔ اس حادثے کے نتیجے میں تیسری گاڑی میں بیٹھے دو افراد شدید زخمی ہو گئے جبکہ یہ کار سڑک سے اتر کر قلابازیاں کھاتی ہوئی دور جا کر گری، جس کے بعد ایک دھماکہ ہوا اور اس کار کو آگ لگ گئی۔

ہیلی کاپٹروں کے ذریعے ریسکیو

روئٹلنگن پولیس کے ایک ترجمان کے مطابق سیلف ڈرائیونگ بی ایم ڈبلیو کی وجہ سے جو متعدد حادثے ہوئے، ان میں مجموعی طور پر ایک شخص ہلاک اور نو دیگر زخمی ہو گئے۔ یہ حادثے اتنے شدید تھے کہ فوری طور پر چار ریسکیو ہیلی کاپٹر موقع پر بلوانا پڑے، جنہوں نے زخمیوں کو ہسپتال پہنچایا۔

زخمیوں میں سیلف ڈرائیونگ بی ایم ڈبلیو میں سوار پانچ افراد بھی شامل ہیں۔ ان میں سے اس گاڑی کے ڈرائیور کی عمر 43 برس بتائی گئی ہے۔ باقی تین بالغوں کی عمریں 31، 42 اور 47 برس بتائی گئی ہیں جبکہ زخمی ہونے والے بچے کی عمر صرف ڈیڑھ سال ہے۔ یہ پانچوں بھی اب ہسپتال میں زیر علاج ہیں۔

جرمنی میں الیکٹرک کاروں پر حکومتی سبسڈی بڑھا دی گئی

زخمیوں کی طبی حالت کے باعث پولیس ابھی تک ان کے بیانات ریکارڈ نہیں کر سکی۔ یہ بھی واضح نہیں کہ جب سیلف ڈرائیونگ بی ایم ڈبلیو ایک موڑ مڑتے ہوئے اپنی لین سے باہر نکل گئی تھی تو تب اسے اس کا 43 سالہ ڈرائیور خود چلا رہا تھا یا یہ الیکٹرک کار خود کار سیلف ڈرائیونگ حالت میں سفر میں تھی۔

اس واقعے کے بعد بی ایم ڈبلیو سے جب اس کمپنی کا ردعمل معلوم کرنے کے لیے رابطہ کیا گیا، تو اس ادارے نے کوئی بھی جواب دینے سے معذرت کر لی۔

م م / ع ا (اے پی)