میکسیکو: صحافی کے قتل کے الزام میں سیاست دان کی گرفتاری

میکسیکو کی شمالی ریاست چیہواوا میں پولیس نے ملک کی معروف صحافی میرسلوا بریچ کے قتل میں ملوث ہونے کے شبے میں ایک مقامی سیاسی رہنما کو گرفتار کیا ہے۔ مذکورہ صحافی کو تقریباً چار برس قبل ان کے گھر کے باہر گولی مار کر ہلاک کردیا گيا تھا۔

مذکورہ سیاست دان پر الزام ہے کہ انہوں نے ہی قاتلوں کو صحافی سے متعلق معلومات فراہم کی تھیں۔ حکام کے مطابق جب یہ واقعہ پیش آیا اس وقت یہ مقامی سیاسی رہنما ریاست کے شہر چنی پاس کے میئر ہوا کرتے تھے۔ ان کا تعلق قدامت پسند سیاسی جماعت 'نیشنل ایکشن پارٹی' (پی اے این) سے ہے۔

سن 2017  کی بات ہے صحافی میرسلوا بریچ 23 مارچ کے روز شمالی ریاست چیہواوا میں اپنی رہائش گاہ کے باہر کار میں تھیں تبھی ان پر فائرنگ کی گئی جس میں ان کو آٹھ گولیاں لگی تھیں۔

وہ میکسیکو کےمعروف اخبار لا جرانڈا اور ایک مقامی ویب سائٹ کے لیے بطور نامہ نگار کام کیا کرتی تھیں۔ انہوں نے بدعنوانی اور جرائم سے متعلق کافی رپورٹنگ کی تھی۔ اپنی موت سے تقریباً ایک برس قبل انہوں نے اپنی ایک سیریز میں لائینیا کے نام سے معروف منظم جرائم پیشہ گروپ اور سیاست دانوں کے درمیان مبینہ تعلقات کے حوالے سے تفصیلی رپورٹنگ کی تھی۔  

اس سے قبل مذکورہ صحافی کے قتل کے ہی جرم میں عدالت نے لاس سلازار شہر کے ایک مقامی رہنما کو 50 برس قید کی سزا سنائی تھی۔ 

 عالمی سطح پر صحافیوں کے لیے میکسیکو کا شمار خطرناک ترین ممالک میں ہوتا ہے۔ ملک میں انسانی حقوق کے نائب وزیر الجیانڈرو انشیناس کے مطابق اس برس میکسیکو میں اب تک 19 صحافیوں کو قتل کیا جا چکا ہے اور اس مناسبت سے گزشتہ ایک عشرے کے دوران صحافیوں کے لیے یہ سب سے برا سال ثابت ہوا۔

ص ز/ ک م  (اے ایف پی، ڈی پی اے)