نگران وزیراعظم کا معاملہ پارلیمانی کمیٹی کے حوالے

پاکستانی آئین کے مطابق پارلیمان کی مدت ختم ہونے کے بعد تین روز کے اندر اندر سربراہ حکومت اور پارلیمان میں قائد حزب اختلاف نے باہمی مشاورت سے نگران وزیراعظم مقرر کرنا ہوتا ہے۔ تاہم پہلی مرتبہ مدت پوری کرنے والی حکومتی جماعت پاکستان پیپلز پارٹی اور اپوزیشن جماعت مسلم لیگ ن کے درمیان طے شدہ وقت میں اتفاق رائے نہیں ہو سکا۔

پاکستان میں اگلے پارلیمانی انتخابات رواں برس مئی میں متوقع ہیں۔ عبوری مدت میں کاروبار حکومت چلانے اور ملک میں انتخابات منعقد کرانے کے لیے نگران حکومتی سربراہ کے لیے پاکستانی وزیر اعظم راجہ پرویز اشرف اور پارلیمان میں اپوزیشن سربراہ چوہدری نثار علی خان کی طرف سے تین تین نام تجویز کیے گئے تھے تاہم کسی ایک نام پر ان دونوں جماعتوں کا اتفاق نہ ہو پایا۔

مقررہ تین روز میں نگران وزیراعظم کے نام پر عدم اتفاق کے باعث اب یہ معاملہ ایک خصوصی کمیٹی کے سپرد کر دیا گیا ہے۔ اب دونوں جماعتوں کی طرف سے اس کمیٹی کو دو دو نام تجویز کیے جائیں گے۔ چار حکومتی اور چار اپوزیشن جماعت کے سابق ارکان پارلیمان پر مشتمل آٹھ رکنی کمیٹی کے پاس اب تین دن کا وقت ہے۔ اگر جمعہ 22 مارچ کی نصف شب تک یہ کمیٹی بھی کسی ایک نام پر متفق نہ ہو پائی تو قانون کے مطابق یہ معاملہ الیکشن کمیشن آف پاکستان کے سپرد ہو جائے گا۔

خبر رساں ادارے روئٹرز نے ایک حکومتی اہلکار کے حوالے سے بتایا ہے کہ اس کمیٹی کا ابتدائی اجلاس آج بدھ کے روز ہوگا۔ قبل ازیں منگل کے روز چوہدی نثار علی خان نے پیپلز پارٹی پر الزام لگایا کہ وہ ایک شفاف نگران سیٹ اپ لانے کے لیے مخلص نہیں ہے۔

aba/ng (dpa)