نیویارک میں چینی 'پولیس اسٹیشن' چلانے پر دو افراد گرفتار

امریکی حکام نے 17 اپریل پیر کے روز بتایا کہ نیویارک میں چینی ''خفیہ پولیس سٹیشن'' چلانے کے الزام میں دو افراد کو گرفتار کیا گیا ہے۔ مبینہ طور پر یہ چینی پولیس مرکز منہیٹن کے چائنا ٹاؤن کے علاقے میں واقع تھا۔

نیدرلینڈز اور کینیڈا میں چینی ’پولیس مراکز‘ کی تحقیقات

اس حوالے سے نیویارک کے دو رہائشیوں کو امریکی حکام کو بتائے بغیر چین کی حکومت کے لیے بطور ایجنٹ کے کام کرنے کی سازش کرنے کے ساتھ ہی انصاف میں رکاوٹ ڈالنے کے الزامات کا سامنا ہے۔ توقع ہے کہ انہیں نیویارک کے بروکلین علاقے میں واقع وفاقی عدالت میں پیش کیا جائے گا۔

سکیورٹی کیمرہ، کیا چین کو حساس معلومات تک رسائی حاصل ہے؟

 بروکلین کے اعلیٰ وفاقی پراسیکیوٹر بریون پیس نے کہا، ''نیویارک شہر کے وسط میں ایک خفیہ پولیس اسٹیشن قائم کرنے کا یہ کیس، چینی حکومت کی جانب سے ہماری قومی خود مختاری کی صریح خلاف ورزی کا مظہر ہے۔''

امریکہ نے چینی ٹیلی کام اور نگرانی والے کیمروں پر پابندی لگادی

ان کا مزید کہنا تھا، ''ہمیں اپنے عظیم شہر میں خفیہ پولیس اسٹیشن کی نہ تو ضرورت ہے اور نہ ہی ہم ایسا چاہتے ہیں۔''

برطانیہ میں حکومتی عمارتوں میں چینی ساختہ کیمروں پر پابندی عائد

چینی باشندوں کے خلاف 'بین الاقوامی جبر کی اسکیمیں '

امریکی استغاثہ کا کہنا ہے کہ جن دو افراد کو گرفتار کیا گیا ہے، ان میں سے ایک نے چین سے مفرور سمجھے جانے والے فرد کو گھر واپس جانے پر آمادہ کرنے کی کوشش کی۔ مذکورہ فرد نے ہراساں کیے جانے اور دھمکیاں ملنے کی اطلاع بھی دی تھی۔

کیا چینی سیٹلائٹ تجربہ ناکام ہو گیا؟

استغاثہ کا یہ بھی کہنا تھا کہ چینی حکومت نے سن 2022 میں مبینہ ایجنٹ سے کیلیفورنیا کے اس رہائشی کو تلاش کرنے میں مدد کرنے کو کہا تھا، جسے جمہوریت کا حامی کارکن سمجھا جاتا ہے۔

استغاثہ کے مطابق دونوں افراد نے ایف بی آئی کے سامنے اس بات کا اعتراف کیا کہ جب انہیں معلوم ہوا کہ وہ زیر تفتیش ہیں، تو انہوں نے چینی حکومت کے ساتھ ہونے والے رابطوں اور بات چیت کو ڈیلیٹ کر دیا۔

پیر کے روز ہی استغاثہ نے 34 چینی سکیورٹی اہلکاروں پر ایسے مختلف الزامات عائد کیے کہ وہ کس انداز سے امریکہ میں رہنے والے مخالفین کی نگرانی اور انہیں ہراساں کرنے کی مہم چلا رہے ہیں۔

بروکلین کے اعلیٰ وفاقی پراسیکیوٹر نے کہا کہ یہ الزامات ''نیویارک سٹی اور امریکہ کے دیگر مقامات پر رہنے والے چینی باشندوں کے ارکان کو نشانہ بنانے والے بین الاقوامی جبر کے منصوبوں سے متعلق ہیں۔''

خفیہ نگرانی مراکز سے ایف بی آئی کے سربراہ پریشان

اس سے قبل بھی وفاقی استغاثہ نے چین اور دیگر ممالک کے ایک درجن سے زائد شہریوں پر امریکہ میں رہنے والے منحرف افراد کے خلاف نگرانی اور ہراساں کرنے کی مہم چلانے کا الزام عائد کیا تھا۔

نومبر 2022 میں، ایف بی آئی کے ڈائریکٹر کرسٹوفر رے نے امریکی سینیٹ کی ایک کمیٹی کو بتایا تھا کہ وہ امریکی شہروں میں خفیہ نگرانی کے مراکز کی موجودگی پر ''بہت فکر مند'' ہیں۔ ان کا کہنا تھا کہ بیجنگ نے خفیہ پولیس کی موجودگی قائم کر کے امریکہ کی خود مختاری کی خلاف ورزی کی ہے۔

امریکہ واحد ملک نہیں ہے، جس نے اپنی سرزمین پر غیر قانونی چینی پولیس اسٹیشنوں کی موجودگی کی اطلاع دی ہو۔ گزشتہ برس کے اواخر میں نیدرلینڈز نے کہا تھا کہ اس نے ایمسٹرڈم اور روٹرڈیم میں دو مبینہ بیرونی چینی قانون نافذ کرنے والے مراکز کی تحقیقات شروع کی ہیں۔

گزشتہ سال ستمبر میں اسپین میں قائم انسانی حقوق کی غیر سرکاری تنظیم 'سیف گارڈ ڈیفنڈرز' نے اطلاع دی تھی کہ بیجنگ نے ''پانچ بر اعظموں کے درجنوں ممالک'' میں اپنے بیرونی پولیس ''سروس اسٹیشن'' قائم کیے ہیں۔

 ص ز/ ج ا (روئٹرز، اے پی، اے ایف پی)