ویسٹ انڈیز نے ٹی ٹوئنٹی کرکٹ ورلڈ کپ جیت لیا

ویسٹ انڈیز نے پہلے بیٹنگ کرتے ہوئے چھ کھلاڑیوں کے نقصان پر 137رنز بنائے، جس سے ورلڈ ٹوئنٹی ٹوئنٹی کا ٹائٹل اپنے نام کرنے کے لیے سری لنکا کی امیدیں بڑھ گئی تھیں۔ تاہم ان کے بیٹسمین ہدف تک پہنچنے میں ناکام رہے۔ ویسٹ انڈیز نے انیسویں اوور میں سری لنکا کے تمام کھلاڑی آؤٹ کر دیے۔ اس وقت اس کا مجموعی اسکور 101تھا۔

سری لنکا نے اپنی اننگز کا آغاز خاصے اچھے انداز سے کیا تھا۔ ایک وقت پر ایک کھلاڑی کے نقصان پر ان کا اسکور 48 تھا تاہم بعد میں ایک کے بعد ایک ان کے تمام بیٹسمینوں کو ناکامی کا سامنا کرنا پڑا۔

خبر رساں ادارے روئٹرز کے مطابق اتوار کو کولمبو میں بارش کا خدشہ تھا، جس کے پیش نظر سری لنکا کی ٹیم اپنے رنز کی اوسط بلند رکھنا چاہتی تھی اور یہ تیزی بھی کسی حد تک ان کی ناکامی کا باعث بنی ہے۔

سری لنکا کے کپتان مہیلا جے وردھنے نے 33 رنز بنائے۔ سابق کپتان کمار سنگاکارا نے 22 اور نوان کلاسیکارا نے 26 رنز بنائے۔ ان کے علاوہ سری لنکا کا کوئی بھی بیٹسمین پانچ سے زیادہ کا انفرادی اسکور بنانے میں کامیاب نہیں ہوا۔

ویسٹ انڈیز کی جانب سے اسپنر سنیل نارائن نے نو رنز کے عوض تین وکٹیں حاصل کیں۔ قبل ازیں ویسٹ انڈیز کی ٹیم نے ٹاس جیت کر پہلے بیٹنگ کا فیصلہ کیا جو ان کی اننگز کے دوران کچھ ایسا درست دکھائی نہیں دے رہا تھا۔

سری لنکا کے بولروں نے بڑا ہدف کھڑا کرنے کے لیے ویسٹ انڈیز کی کوششوں کو بڑی حد تک ناکام بنایا۔ صورت حال یہ تھی کہ دس اوورز میں ویسٹ انڈیز دو وکٹوں کے نقصان پر محض 32 رنز بنا پایا تھا۔

سری لنکا کے اسپنر اجانتھا مینڈس نے 12 رنز کے عوض چار وکٹیں لیں اور یوں بظاہر انہوں نے ویسٹ انڈیز ٹیم کی کمر توڑ دی تھی۔ تاہم مارلون سیموئیلز نے 56 گیندوں کا سامنے کرتے ہوئے 78 رنز بنائے اور اپنی ٹیم کو سہارا دیا۔

قبل ازیں گزشتہ ہفتے کے دوران ٹورنامنٹ کے سیمی فائنلز میں سری لنکا نے پاکستان کو جبکہ ویسٹ انڈیز نے آسٹریلیا کو شکست دیتے ہوئے فائنل میں جگہ بنائی تھی۔

دوسری جانب اتوار کے فائنل کے بعد سری لنکا کے مہیلا جے وردھنے ٹوئنٹی ٹوئنٹی ٹیم کے کپتان کی حیثیت سے مستعفی ہو گئے ہیں۔ تاہم انہوں نے یہ بھی کہا کہ ان کے اس فیصلے کہ فائنل میں شکست سے کوئی تعلق نہیں ہے۔

ng/aba (Reuters, AFP)