چيمپئنز ليگ فائنل ميں ريئل ميڈرڈ کا سامنا اٹليٹيکو ميڈرڈ سے

برطانيہ کے شہر لندن کے اسٹيمفرڈ برج اسٹيڈيم ميں بدھ کی شب کھيلے جانے والے چيمپئنز ليگ کے ایک سيمی فائنل مقابلے کے دوسرے مرحلے ميں مہمان ٹيم اٹليٹيکو ميڈرڈ نے ميزبان ٹيم چيلسی کو تين کے مقابلے ميں ايک گول سے شکست ديتے ہوئے فائنل کے ليے کواليفائی کر لیا ہے۔

تيس اپريل کی رات کھيلے جانے والے اِس ميچ ميں مخالف ٹيم کے سابق اور اِن دنوں چيلسی کے ليے کھيلنے والے اسٹرائيکر فرنانڈو ٹوریس نے چھتيسويں منٹ ميں گول کر کے اپنی ٹيم کو برتری دلوا دی تاہم يہ برتری محض آٹھ منٹوں ہی تک برقرار رہی۔ ميڈرڈ کے ليے پہلے ہاف کے اختتامی لمحات ميں ايڈرين لوپيز نے پينلٹی کِک پر گول اسکور کرتے ہوئے اسکور برابر کر ديا۔ دوسرے ہاف ميں مہمان ٹيم کے ليے ڈيئيگو کوسٹا اور پھر آرڈا ٹوران نے ايک ايک گول کرتے ہوئے ہسپانوی کلب اٹليٹيکو ميڈرڈ کی جيت کو يقينی بنا ديا۔

گزشتہ ہفتے منگل کی شب سيمی فائنل کے پہلے ليگ ميں ميڈرڈ ميں کھيلے جانے والے ميچ ميں دونوں ٹيميں گول کرنے سے قاصر رہی تھيں اور يوں دونوں ليگوں کے بعد مجموعی اسکور تين ايک سے اٹليٹيکو ميڈرڈ کے حق ميں رہا۔

قبل ازيں بدھ انتيس اپريل کی شب دوسرے سيمی فائنل کے دوسرے مرحلے ميں ايک اور ہسپانوی کلب ريئل ميڈرڈ نے جرمن کلب بائرن ميونخ کو چار صفر سے شکست ديتے ہوئے فائنل کے ليے کواليفائی کر ليا تھا۔ ريئل ميڈرڈ نے پہلے مرحلے ميں بھی بائرن کو ايک کے مقابلے ميں صفر گول سے شکست دی تھی۔

ريئل ميڈرڈ کی ٹيم تيرہويں مرتبہ چيمپئنز ليگ کے فائنل تک پہنچی ہے جبکہ يہ ٹيم نو مرتبہ يورپی چيمپئن بھی بن چکی ہے۔ اس کے برعکس اٹليٹيکو ميڈرڈ صرف دوسری مرتبہ ہی اس يورپی ٹورنامنٹ کے فائنل تک پہنچی ہے۔ اس سے پہلے اٹليٹيکو ميڈرڈ 1974ء ميں چيمپئنز ليگ کے فائنل تک پہنچی تھی اور اس ميچ ميں جرمن کلب بائرن ميونخ نے اسے شکست سے دوچار کر ديا تھا۔

چيمپئنز ليگ کے رواں سيزن کا فائنل ميچ چوبيس مئی کے روز پرتگالی شہر لزبن ميں کھيلا جائے گا۔