چیمپئن شپ جیت کر کوچنگ کو خیرباد کہہ دیا

فرانس سے تعلق رکھنے والے لیجنڈری فٹ بالر زینادین زیدان نے اعلان کیا ہے کہ وہ ریال میڈرڈ کے لیے مزید کوچنگ نہیں کریں گے۔ وہ گزشتہ ڈھائی برسوں سے ہسپانوی کلب ریال میڈرڈ کے کوچ چلے آ رہے تھے۔ ہسپانوی کلب ریال میڈرڈ یورپ کے معتبر اور مشہور فٹ بال کلبوں میں شمار ہوتا ہے۔

چیمپئنز لیگ کی فتح کے بعد اس کا قوی امکان تھا کہ کلب انتظامیہ اُن کے کوچنگ کنٹریکٹ میں توسیع کر دے گی۔ ریال میڈرڈ نے فرانس کے سابق فٹ بالر کے کوچنگ ایام میں مجموعی طور پر نو مختلف اعزازت حاصل کیے۔ ان میں تین مرتبہ چیمپئنز لیگ کی ٹرافی جیتنے  کو انتہائی اہم خیال کیا گیا ہے۔

جمعرات اکتیس مئی کو زیدان نے صحافیوں پر واضح کیا کہ انہیں احساس ہوا ہے کہ صحیح وقت آ گیا ہے کہ وہ اور کسی کلب کی کوچنگ شروع کر دیں۔ بارسلونا میں صحافیوں سے گفتگو کرتے ہوئے انہوں یہ بھی کہا کہ اُن کا یہ فیصلہ حیران کن ضرور ہے لیکن سبھی کے لیے درست اور مناسب ہو گا۔

ریال میڈرڈ کے کوچ نے کلب کے ساتھ اپنے لگاؤ کا اظہار کرتے ہوئے کہا کہ چیمپئنز لیگ کی ٹرافی جیتنے کے بعد ایسا سوچنا مشکل کام تھا لیکن مشکل وقت میں سوچ درست سمت کی تعین کرنے میں مدد کرتی ہے۔ زیدان ریال میڈرڈ کی تاریخ کے ایک کامیاب کوچ بن کر ابھرے ہیں۔

اُن کی کوچنگ میں میڈرڈ نے کُل ایک سو انچاس میچ کھیلے اور ان میں سے اس کلب کو ایک سو چار میں کامیابی حاصل ہوئی۔ برابر رہنے والے میچوں کی تعداد انتیس اور ہارنے والے میچ محض سولہ تھے۔ اس طرح اُن کی کامیابی کا تناسب تقریباً ستر فیصد کے قریب رہا۔

پینتالیس سالہ فرانسیسی فٹ بالر نے جنوری سن 2016 میں ریال میڈرڈ کی کوچنگ کی ذمہ داریاں سنبھالی تھیں۔ اُس وقت ایسے شکوک کا اظہار کیا گیا تھا کہ زیدان بطور کوچ ناکام بھی ہو سکتے ہیں کیونکہ وہ اس فیلڈ میں کوئی تجربہ نہیں رکھتے۔ وقت گزرنے کے ساتھ زیدان نے ثابت کیا کہ وہ بغیر کسی تجربے کے بھی ایک ماہر کوچ ہیں۔ ماہرین کے مطابق انہوں نے ریال میڈرڈ کے کھلاڑیوں میں ایک نئی قوت پیدا کی۔