چیمپئنز لیگ، بائرن میونخ نے بارسلونا کو تاریخی شکست سے دوچار کر دیا

سیمی فائنل کی پہلی لیگ میں بائرن میونخ نے ہسپانوی کلب بارسلونا کو صفر کے مقابلے میں چار گول سے شکست دی تھی۔ اس طرح مجموعی طور پر سیمی فائنل میں بائرن میونخ نے بارسلونا کو صفر کے مقابلے میں سات گول سے ہرایا۔ فائنل میں میونخ کا مقابلہ ڈورٹمنڈ سے ہو گا۔ جرمن کلب ڈورٹمنڈ نے اس سے قبل کھیلے گئے سیمی فائنل کی دونوں لیگز میں میڈرڈ کو مجموعی طور پر تین کے مقابلے میں چار گول سے شکست دے کر فائنل میں جگہ بنائی تھی۔ اب فائنل ميچ کا نتيجہ چاہے کسی بھی ٹيم کے حق ميں ہو، اس برس کی چیمپئنز لیگ ٹرافی جرمنی ہی آئے گی۔

بارسلونا کی ٹیم بدھ کی شام سیمی فائنل کی دوسری لیگ کھیلنے کے لیے شہرہ آفاق کھلاڑی لیونل میسی کے بغیر ہی میدان میں اتری تاہم کھیل میں ایسا کوئی بھی موقع نہ آیا کہ جب اس کی جانب سے بائرن میونخ کے گول پر کوئی بڑا حملہ کیا گیا ہو۔ دوسری جانب بائرن میونخ کی ٹیم جو اس سیمی فائنل کی پہلی لیگ میں چار صفر سے برتری لیے ہوئے تھی، انتہائی مربوط انداز میں کھیلتی نظر آئی اور کھلاڑيوں کے درمیان خوبصورت تال میل دکھائی دیا۔

پہلے ہاف کے اختتام تک کوئی بھی ٹیم گول کرنے میں کامیاب نہیں ہوئی تھی۔ تاہم دوسرے ہاف کے آغاز کے کچھ دیر بعد ہی بائرن میونخ کی جانب سے روبن نے گول کر کے اپنی ٹیم کی پوزیشن کو مزید مضبوط کر دیا۔ کھیل کے 72 ویں منٹ میں بارسلونا کے کھلاڑی Gerard Pique نے اپنے ہی گول میں بال پہنچا دی اور اس طرح بائرن میونخ کی برتری دو صفر ہو گئی۔

اس کے کچھ دیر بعد بائرن میونخ کی جانب سے تھوماس میولر نے ہيڈ کے ذريعے ایک خوبصورت گول کر کے یہ برتری تین صفر اور مجموعی طور پر سات صفر کر دی، جو کھیل کے اختتام تک برقرار رہی۔

بائرن میونخ اب 25 مئی کو ویمبلی اسٹیڈیم میں چیمپیئز لیگ کے فائنل میں ڈورٹمنڈ کے مدمقابل ہو گی۔

at/as (AP)