چین: برڈ فلو سے دنیا کی پہلی انسانی موت

چین میں ہلاک ہونے والی 56  سالہ خاتون کا تعلق جنوبی صوبے سے بتایا گیا ہے۔ منگل کی شام دیر گئے ڈبلیو ایچ او کی طرف سے ایک بیان میں کہا گیا کہ گوانگ ڈونگ یہ خاتون چین کی  تیسرا باشندہ ہیں، جن کے بارے میں پتا چلا ہے کہ وہ ایویئن انفلوئنزا کی  ذیلی قسم  H3N8  سے متاثر ہوئیں۔

ایویئن انفلوئنزا کی ذیلی قسم  H3N8  کے تمام تین کیسز چین میں ہی ہوئے سامنے آئے ہیں۔ ان میں سے دو کیسز گزشتہ سال رپورٹ ہوئے تھے۔ تاہم عالمی ادارہ صحت (ڈبلیو ایچ او) کے مطابق ایسا نہیں لگتا کہ یہ  فلو انسانوں سے انسانوں میں آسانی سے پھیل سکتا ہے۔

گوانگ ڈونگ صوبائی مرکز برائے کنٹرول امراض اور روک تھام نے پچھلے مہینے کے آخر میں تیسرے انفیکشن کی اطلاع دی لیکن خاتون کی موت کی تفصیلات فراہم نہیں کیں۔

ڈبلیو ایچ او نے تاہم مریض میں متعدد علامات کی طرف نشاندہی کی ہے اور یہ بھی کہا ہے کہ مذکورہ مریض میں زندہ پولٹری سے رابطے میں آنے کے بعد صحت کی خرابی اور بیماری کی علامات  کی 'ہسٹری‘ پائی جاتی تھی۔

انسانوں میں برڈ فلو کے اکا دکا انفیکشنز

چین  میں پولٹری اور جنگلی پرندوں کی آبادی میں ایویئن فلو وائرس مسلسل بڑے پیمانے پر گردش کرتے رہتے ہیں تاہم اس کے اکا دکا کیسز ہی انسانوں میں رونما ہوئے ہیں۔

ڈبلیو ایچ او کے مطابق ایک گیلا بازار جہاں فلو سے ہلاک ہونے والی خاتون بیمار ہونے سے پہلے جاتی رہی تھیں، سے جمع کیے گئے نمونوں سے پتا چلا ہے کہ یہاں انفلوئنزا A(H3) پایا جاتا ہے۔ عالمی ادارہ صحت ڈبلیو ایچ او کا خیال ہے کہ خاتون میں انفیکشن کا ذریعہ یہی ہوسکتا ہے۔

 H3N8 انفکشن اگرچہ لوگوں میں بہت ہی نایاب ہے تاہم پرندوں میں عام ہے۔ یہ انفکشن بیماری کی کوئی علامت یا نشان ظاہر نہیں کرتا ہے۔ اس انفکشن نے دیگر میملز یا دودھ پلانے والے جانوروں کو بھی متاثر کیا ہے۔

ڈبلیو ایچ او نے کہا ہے کہ ہلاک ہونے والی یا متاثرہ خاتون کے قریبی حلقے سے تاہم کسی اور شخص میں برڈ فلوکی اس قسم کی موجودگی اب تک نہیں ظاہر ہوئی ہے۔ 

ڈبلیو ایچ او نے ایک بیان میں کہا،''دستیاب معلومات کی بنیاد پر، ایسا لگتا ہے کہ یہ وائرس ایک شخص سے دوسرے میں آسانی سے پھیلنے کی صلاحیت نہیں رکھتا ہے۔  اس وجہ سے انسانوں میں اس کے پھیلنے کا خطرہ قومی، علاقائی اور بین الاقوامی سطح پر کافی کم ہے۔‘‘

ک م/ ع ب(روئٹرز)