ڈی ڈے: کیا مشترکہ یادگاری تقریبات ممکن ہیں؟

پندرہ برس قبل جرمن چانسلر گیرہارڈ شروئڈر وہ پہلے جرمن سربراہ حکومت تھے، جو ڈی ڈے کی تقریبات میں شریک ہوئے تھے۔ تب ڈی ڈے کےساٹھ برس مکمل ہوئے تھے۔ اتحادی افواج نے بھاری جانی نقصان اٹھا کر یورپی براعظم کو نازی جرمنی کے پنجے سے چھڑایا تھا۔

چھ جون سن 1944 کے روز نارمنڈی پہنچنے کے بعد اتحادی افواج کے ساڑھے چار ہزار کے قریب فوجی ہلاک ہوئے تھے۔

 ڈی ڈے کے ستر برس مکمل ہونے کی تقریبات میں چانسلر انگیلا میرکل بھی شریک ہوئی تھیں۔ میرکل آج چھ جون سن 2019 کو ڈی ڈے کے پچھتر برس مکمل ہونے کی تقریبات میں بھی شرکت کر رہی ہیں۔

پچھتر برس مکمل ہونے کی تقریبات کا آغاز اس مرتبہ جنوبی انگلینڈ کے شہر پورٹسمتھ سے ہوا، جس میں فرانسیسی اور امریکی صدور کے ہمراہ برطانوی وزیراعظم بھی شریک تھی۔ پورٹسمتھ سے ہی اتحادی افواج نے اپنی بھاری نفری فرانسیسی ساحلی شہر نارمنڈی کی جانب روانہ کی تھی۔

حالیہ برسوں میں یہ دیکھا گیا ہے کہ دوسری عالمی جنگ میں فتح کی یادگاری تقریبات میں جرمن رہنما بھی شریک ہوتے ہیں۔ سن 1985 میں جرمن صدر رشارڈ فان وائتسیکر نے دوسری عالمی جنگ کے خاتمے کے چالیس برس مکمل ہونے کی تقریبات کے موقع پر کہا تھا کہ یہ جنگ جرمنی کے لیے بھی آزادی اور نجات کا باعث بنی تھی۔

جرمنی میں رشارڈ فان وائتسیکر کے ان الفاظ کے تناظر میں کوئی اختلاف نہیں پایا جاتا۔ جرمن تاریخ کے ماہر گیرڈ کرُم آئش نے ڈی ڈبلیو سے گفتگو کرتے ہوئے واضح کیا کہ بظاہر یہ بات تاریخ کے کوڑا دان کا حصہ بن چکی ہے کہ جرمنی آزاد ہوا تھا یا اس پر فتح حاصل کی گئی تھی لیکن یہ ایک حقیقت ہے کہ دریائے رائن کے دونوں جانب ڈی ڈے کو مختلف انداز میں وقعت دی جاتی ہے اور اوقیانوس کے آرپار بھی اس کی حیثیت مختلف ہے۔

ڈی ڈے کے حوالے سے امریکی مضمون نگار ایڈم گوپنک کا خیال ہے کہ امریکا میں اسے خالصتاً ’امریکی فوجی آپریشن‘ خیال کیا جاتا ہے۔ یہ حقیقت ہے کہ اس مشن میں برطانوی، کینیڈین، فرانسیسی، پولستانی اور نیوزی لینڈ کے فوجی دستے بھی شامل تھے۔

جرمن عوام میں بھی امریکی فلمی صنعت کی دوسری عالمی جنگ پر بنائی گئی فلموں سے یہ تاثر پیدا ہوا کہ امریکی فوج ہی سب طرف تھی۔ برطانوی مؤرخ جیمز ہالینڈ تحریر کرتے ہیں کہ اگرچہ اتحادی فوج کے سپریم کمانڈر جنرل ڈویٹ آئزن ہاور تھے لیکن ان کے زیر کمان تمام اہم پوزیشنوں پر برطانوی فوجی افسران تعینات تھے۔ ماہر تاریخ ہالینڈ کے مطابق تین چوتھائی بحریہ برطانوی نیوی پر مشتمل تھی۔ اسی طرح نازی اہداف پر فضائی حملوں میں بھی دو تہائی حد تک برطانوی ایئر فورس ہی شریک تھی۔