Kungiyar Bako Haram ta kai hari a Marte

Rahotanni daga yankin sun ce an shafe tsawon yammacin ranar Jumma'a ana artabu da maharan, wadanda suka far wa sansanin sojan da muggan makama. Majiyar soji a Najeriya da ba ta so a bayyana sunanta ba ta tabbatar da harin na mayakan kungiyar Boko Haram, tare da tabbatar da cewa har yanzu kungiyar ce ke riko da iko da barikin sojan.

Wannan lamarin na zuwa ne a daidai lokacin da ake ci gaba da gwabza yaki a yankin Tafkin Chadi tsakanin mayakan kungiyar da jami'an tsaro, a wani yunkuri na kawo karshen ayyukan kungiyar da suka yi sanadiyar rayukan mutane, da tilasta wa wasu kaurace wa gidajensu galibin su fararen hula.