China ta daure mutum 15 bayan ruftawar wani gini

Kafar yada labaran China ta ce gwamnatin kasar ta daure wasu mutum 15 da ke da hannu a gina wani katafaren gini da ya rufta kan gomman mutane a kasar.

A watan Afrilun 2022 ne wani gini da ake amfani da shi wajen cinikayya ya rufta kan jama'a a birnin Changsha na tsakiyar kasar, lamarin da ya haddasa mutuwar sama da mutum 50 tare da jikkata wasu tara.

Karin bayani: Guguwar Yagi ta yi ta'adi a Vietnam da China

Daga bisani hukumomi sun bayyana cewa ba a bi ka'ida ba wajen yin ginin, abinda ya jawo cece-kuce kan cin hanci da rashawa a harkar gine-ginen kasar.

Kafar yada labaran China CCTV ta ce wasu kotuna biyu a birnin na Changsha sun yanke hukunci kan mutum 15 da ke da hannu a faruwar al'amarin.

Karin bayani: Sojojin China na gagarumin atisaye kusa da Taiwan

Wasu daga cikin mutanen da hukuncin ya shafa kamar  Wu Zhiyong mazauni a inda ginin ya rufta zai shafe shekara 11 a magarkama.