1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Talabijin kai tsaye
Shirye-shiryen DW HausaBidiyo
Mayar da hankali
Ilimin Fasahar Zamani
Siyasa

Isra'ila na fuskantar matsi daga Amirka kan yakin Lebanon

Fauziyya Dauda
October 16, 2024

Rundunar Sojin Isra'ila ta ce ta kai hari kudancin Beirut, bayan da Firanministan kasar Benjamin Netanyahu ya yi watsi da matakin tsagaita bude wuta a Lebanon.

https://p.dw.com/p/4lqox
Ersthelfer suchen nach israelischem Luftangriff in Aitou, Libanon nach Überresten von Opfern
Hoto: Timothy Wolfer/ZUMA/IMAGO

An ruwaito cewa, hayaki ya turnuke a birnin Haret Hreit bayan da Isra'ila ta kai farmakin jim kadan bayan da dakarun soji sun bukaci mazauna yankin da su kaura. Isra'ilar ta yi ikrarin lalata ma'ajiyar makaman mayakan Hezbollah. Netanyahu ya sha alwashi ci gaba da yakar kungiyar Hezbollah ne yayin da Amirka ke kara matsa mata lamba kan yadda Isra'ila ke gudanar da yaki a Lebanon da kuma Gaza, tare da neman shigar da karin kayan agaji zuwa Falasdinu.

Karin bayani: Isra'ila ta yi ruwan bama-bamai a tsakiyar Beirut na Lebanon

Shugaba Joe Biden na Amirka, da gwamnatinsa ce babbar mai bai wa Isra'ila makamai, ya gargadi Isra'ilar da kar ta kuskura ta kai hari kan tashoshin nukiliya da kuma na mai mallakin Iran.

A gefe guda, wani babban jami'in diflomasiyyar Iran ya gargadi babban sakataren Majalisar Dinkin Duniya Antonio Guterres, cewa a shirye Iran take ta mayar da martani kan Isra'ila da za ta yi nadama idan ta kai mata harin ramuwar gayya.