Haramta shan shisha a Kano

Tun da fari dai Hukumar ta Hisba, ta sanya dokar haramta saye da sayar da tabar shishar. Inda ta zargi cewa mafi akasarin masu tu'ammali da shishar da suka kasance matasa, na saka tabar wiwi da sauran kwayoyin da magungunan da ke saka maye aciki kafin su zuka. Sai dai kuma duka da cewa wasu na yaba matakin na Hisba, masana shari'a na ganin cewa matakin nata ya wuce gona da iri. Duk da cewa Hukumar Hisba din ta ayyana sanarawa tare da bayar da umurnin hana tu'ammali da shishar, wasu daga cikin wadanda aka kama din na cewa ba su ma da masaniyar hakan. Koda yake wasu da DW ta zanta da su bayan da hukumar ta kai samame wajen shan shishar ta kuma cafke su, sun nunar da cewa za su daina sha baki daya da zarar sun samu 'yancinsu daga hisba.