Rashin kayan aiki ya sanya likitocin Najeriya yajin aiki

Shugaban kungiyar likitocin masu neman kwarewa da ake kira National Association of Resident Doctors a Turance Uyilawa Okhuaihesuyi ya shaida wa kamfanin dillancin labarai na AFP cewa sun fara yajin aiki bisa wasu alawus dinsu da suka makale a hannun gwamnati. Kazalika likitocin sun ce sun fantsama yajin aikin a sakamakon yadda rashin kayan aiki ke ci gaba da kawo cikas a asibitocin Najeriya.

Sai dai shugaban kungiyar likitocin ya ce duk da cewa a wannan safiya ta Alhamis suka fara yajin aikin, kungiyar likitocin za ta sake gudanar da wani taro a yau din nan domin ganin ko za ta janye yajin aikin biyo bayan tattaunawar da suka yi da bangaren gwamnati a ranar Laraba.