Shugaban Masar na shirin yin tazarce

Babban zaben na Masar dai na zuwa ne, a daidai lokacin da kasar ke cikin matsanancin hali na masassarar tattalin arziki da ke zaman mafi muni da ta taba shiga. Al'ummar kasar Masar din daga shekaru 18 zuwa sama za su kada kuri'unsu a rumfunan zabe 9,400 da aka ware har tsawon kwanaki uku, a zaben da 'yan takara uku ke shirin fafatawa da shugaban kasar mai ci yanzu Abdel Fattah al-Sisi da ke kan karagar mulki tun bayan hambarar da gwamnatin farar hula ta marigayi Mohamed Morsi a shekara ta 2013.