Najeriya: Mayakan Boko Haram sun halaka sojoji

Sojoji shida ne suka kwanta dama, a yayin wani gumurzu a tsakaninsu da mayakan Boko Haram a jihar Borno. Masu gwagwarmaya da makaman sun kai harin na bazata a sansanin sojin da ke yankin Arewa Maso Gabashin kasar. Daya daga cikin jami'an sojin, ya ce sun yi rashin nasara kan mayakan a fafatawar da aka kwashi fiye da sa'o'i biyu ana yi.

Akwai sojoji sama da arba'in da ba a ji duriyarsu ba tun bayan artabun, amma ana ganin sun tsere ne a yayin barin wutar inji wani abokin aikinsu. A dai daren ranar Asabar aka kai harin, a yankin da ayyukan masu tayar da kayar bayan, suka yi sanadiyyar dubban rayuka da tilasta ma mutane fiye da miliyan daya rasa matsuguni.