Putin zai je Koriya ta Arewa

Shugaban Rasha Vladimir Putin ya karbi tayin kai ziyara Koriya ta Arewa a daidai lokacin da shugaban Koriyan Kim Jong Un ya kammala ziyarar da ya kai kasar Rasha. To amma ba a bayyana lokacin da ake sa ran Putin din zai ziyarci Koriya ta Arewar ba.

A ranar Laraba, Shugaba Kim na Koriya ta Arewa a yayin ganawar sa da shugaban Rasha, ya sha alwashin bai wa Shugaba Putin cikakken hadin kan da yake bukata a yakin da yake yi da kasar Ukraine.

Duk da cewa shugabannin ba su yi wa duniya bayani dala-dalla na abin da suka tattauna ba, amma masana na cewa shugaban Rasha na neman manyan makamai masu hadari da kasar Koriya ta Arewa ke da su jibge a rumbunta. Sai dai shugaban Rashan ya yi watsi da zargin da ake masa na karya ka'idar sayen makamai a wannan sabuwar alakar da ake ganin yake kullawa da Shugaba Kim Jong Un.