Kula da jarirai bakwaini a Tanzaniya

Karuwar mutuwar jarirai da ake samu a Tanzaniyan dai, na da nasaba da matsalar rashin ingantattun kayayakin aikin kula da lafiyarsu da kusan daukacin asibitocin kasar ke fama da ita. Ya zuwa yanzu za a iya cewa Ma'aikatar Lafiya ta kasar ta himmatu wajen kawo karshen wannan matsalar, inda ministar lafiya ta Tanzaniya Ummy Mwalimu ta sanar da cewa, an samar da sama da dakunan kula da bakwaini 180 a asibitocin fadin kasar kari a kan 14 da ake da su a baya. Sai dai wata likita Dakta Maria Bitwalo ta ce duk da haka ana samun karuwar jariran da ke mutuwa, amma a nasu bangaren suna kokarin ganin adadin ya sauka sosai. A cewar Hukumar Lafiya ta Duniya WHO, sama da jarirai miliyan 15 ne ke rasa rayukansu a duk shekara mafi akasarinsu bakwaini.