An sace mutane 150 a Zamfara

Mazauna kauyukan hudu da aka yi garkuwa da mutanensu sun tabbatar da cewa maharan sun afkawa karamar hukumar Maru kan babura. Dankandai Musa, wani mazaunin daya daga cikin kauyukan ya ce ya labe ba tare da an gane shi ba a lokacin da aka kawo harin, amma an kwashe mutanen gidansa 20.

"Na yi nasarar tserewa ne bayan sun sake tattara mu da kuma mutanen wasu kauyuka uku da aka kai harin,” inji shi. Ya kara da cewa "Na gudu a lokacin da suke jan mu zuwa daji."

Wani hakimin kauyen ya ce Lawali Damana, shi ne shugaban kungiyar da ta kai harin.

‘Dan bindigar ya bukaci naira miliyan 100 ($119,000) daga hannun mazuna kauyukan a matsayin ramuwar gayya, bayan sojojin Najeriya sun kashe hudu daga cikin mutanensa.

Garkuwa don neman kudin fansa ya zama ruwan dare a arewacin Najeriya a baya-bayan nan inda suke kwashe mutane a gidajensu da makaratu. Har yanzu matakan sabuwar gwamnatin Bola Ahmed Tinubu ba su yi wani cikakken tasiri kan magance matsalar tsaron ba tukun da ke addabar yankunan arewacin Najeriya ba.