ايران ډېره درنده محموله فضا ته استولې ده
۱۴۰۳ آذر ۱۶, جمعه
ايران وويل چې د جمعې په ورځ یې (۲۰۲۴م کال د ډسمبر ۶) په هېواد کې د جوړ شوي یوه راکټ په مرسته د دغه هيواد په تاريخ کې تر اوسه تر ټولو دروند بار فضا ته په برياليتوب سره ليږدولی دی.
دا سپوږمکۍ په داسې حال کې ليږدول کيږي چې د ایران او لوېديځ ترمنځ په منځني ختیځ کې د شخړو او د ایران د لانجمن اتومي پروګرام پر سره ترنګلتياوې مخ پر ډېرېدو دي.
د هېواد د تاريخ د درنې محمولې ليږدول
دغې محمولې کابو ۳۰۰ کيلوګرامه وزن درلود او يوه مخابراتي سپوږمکۍ او فضايي بار وړونکې وسيله پکې شاملې ده. دا سپوږمکۍ د ایران د سمنان ولایت د امام خميني له فضايي اډې څخه وليږدول شوه.
کومې خپلواکې سرچېنې په سملاسي توګه د دې ستېلايت د کاميابي تجربې تائيد نه دی کړی.
ايران په دغه هېواد کې جوړ د سيمرغ ستېلايټ ليږدونکی توغندی د دې عملياتو له پاره کارولی دی. دا راکټ چې د ایران د دفاع وزارت جوړ کړی دی، تر دې دمخه څو ځله له ناکامۍ سره مخامخ شوی دی.
لویدیځ ولې د ايران د فضايي پروګرام په اړه اندیښمن دی؟
امريکا متحده ایالاتو، اسرائيل او د اروپايي هېوادونو حکومتونو په کراتو ايران ته د فضايي پروګرام د پرمختګ په تړاو خبرداری ورکړی وو. دغو هېوادونو استدلال کاوه چې ایران د ستېلايتونو د جوړولو او ليږد له پاره کاريدونکي تکنالوژي د باليستيک ميزايلونو په جوړولو کې کارولی شي چې د اتومي سرګلولو وړتيا لرونکي میزايلونه هم پکې شامل دي.
تهران دا خبره ردوي چې ګني د اتومي وسلو د جوړولو هڅه کوي او وايي چې فضايي پروګرام یې لکه اتومي پروګرام، د ملکي موخو له پاره دی.
د ايران فضايي ظرفيت څومره پرمخ تللی دی؟
د ايران فضايي پروګرام په دې وروستيو کې د پام وړ پرمختګ کړی دی.
د دغه هېواد فضايي ادارې په روان کال کې څو سپوږمکۍ په برياليتوب سره فضا ته استولي دي.
په جنورۍ مياشت کې ايران ويلي ول چې د سيمرغ راکټ په کارولو سره یې په لومړي ځل درې ستېلايټونه په يو ځل فضا ته ليږدولي دي.
په سپتمبر میاشت کې ايران د چمران ۱ په نوم څيړنيزه سپوږمکۍ په هېواد کې د جوړ شوي قايم ۱۰۰ توغندي په مرسته ۵۵۰ کيلومتره وړاندې مدار ته داخله کړه.
د دې سپوږمکيو ليږدول د فضايي تکنالوژۍ په برخه کې د دغه هېواد پرمختللې وړتياوې منعکسوي.