سری نگر میں صحافی پر تشدد

اطلاعات کے مطابق جمعہ کے دن سری نگر میں پولیس نے معراج الدین ڈار کو لاٹھیوں اور بندوق کے بٹوں سے تشدد کا نشانہ بنایا اوراسے بے ہوش کر دیا۔ بتایا گیا ہے کہ ویڈیو جرنلسٹ کو بعد ازاں مقامی ہسپتال منتقل کردیا گیا۔

سری نگرمیں حالیہ شدید مظاہروں کے بعد کرفیو نافذ کیا گیا ہے، اگرچہ معراج الدین کے پاس کرفیو پاس تھا لیکن سکیورٹی اہلکاروں نے اسے ریاستی اسمبلی کے باہر ہی روک دیا اور اسے مارا پیٹا۔

اطلاعات کے مطابق معراج الدین اور اس کا ساتھی صحافی عمر ڈار جمعہ کے دن اپنی گاڑی پر ریاستی اسمبلی کی کوریج کے لئے جا رہے تھے کہ راستے میں انہیں روک دیا گیا، جب ان سے کرفیو پاس کا تقاضہ کیا گیا تو انہوں نے اپنے اپنے پاس سکیورٹی اہلکاروں کو دکھائے لیکن انہیں اسمبلی میں داخل نہ ہونے دیا گیا۔

عمر ڈار نے بتایا ہے کہ جب معراج الدین نے سکیورٹی اہلکاروں کے سربراہ سے ملنے کے لئے کہا تو ایک سپاہی نےغصے کا اظہار کرتے ہوئے اسے تشدد کا نشانہ بنایا، جس کے نتیجے میں وہ بے ہوش ہو گیا۔ اطلاعات کے مطابق موقع پر موجود ایک اور صحافی نے ایک پولیس کمانڈر کو بلایا، جس نے معراج الدین کو ہسپتال منتقل کروانے میں مدد کی۔

سری نگر کی صحافی برادری نے اس واقعے کی شدید مذمت کرتے ہوئے مطالبہ کیا ہے کہ اس کی غیر جانبدارنہ تحقیق کروائی جائے۔ حالیہ احتجاج کے دوران صحافیوں پر ایسے تشدد کی کئی مثالیں سامنے آئی ہیں۔ سری نگر کے ایک اور معروف صحافی شیخ مشتاق نے خبر رساں اداروں کو بتایا ،’’ہم نے خود کو ایسا غیر محفوظ کبھی بھی محسوس نہیں کیا، جتنا کہ آج کل کر رہے ہیں۔‘‘

رپورٹ: عاطف بلوچ

ادارت: عاطف توقیر