خالصتان تحریک کے تین سکھ عسکریت پسند ہلاک، بھارتی پولیس

بھارتی ریاست اتر پردیش کے دارالحکومت لکھنؤ سے پیر 23 دسمبر کو موصولہ رپورٹوں کے مطابق ریاستی پولیس نے آج بتایا کہ جو سکھ عسکریت پسند اس ریاست کے ضلع پیلی بھٹ میں پولیس کے ساتھ ایک مسلح مقابلے میں مارے گئے، ان کا تعلق سکھ علیحدگی پسندی کی اس خالصتان تحریک سے تھا، جو اپنی خونریزی میں 1980ء اور 1990ء کی دہائیوں میں عروج پر تھی۔

بھارتی پنجاب: گولڈن ٹیمپل میں اکالی دل رہنما پر قاتلانہ حملہ

یہی علیحدگی پسندانہ خالصتان تحریک بھارت اور کینیڈا کے درمیان اس سفارتی بحران کا بھی مرکز رہی ہے، جس کی وجہ گزشتہ برس یہ بنی تھی، کہ بھارتی خفیہ اداروں کے اہلکاروں نے مبینہ طور پر کینیڈا میں ایک بہت سرگرم سکھ علیحدگی پسند رہنما کو قتل کر دیا تھا اور امریکہ میں بھی ایسے ہی ایک سکھ رہنما کے قتل کی کوشش کی گئی تھی۔

بھارتی حکومت نے اس حوالے سے نئی دہلی کے خلاف کینیڈین اور امریکی حکام کی طرف سے لگائے گئے الزامات سرے سے مسترد کر دیے تھے۔

اتر پردیش میں ہونے والا پولیس مقابلہ

بھارتی پولیس کے مطابق خالصتان تحریک کے 'باغیوں‘ سے متعلق تازہ ترین واقعے میں سکھ علیحدگی پسندوں کے ایک گروپ کے ساتھ پولیس کی جو مسلح جھڑپ ضلع پیلی بھٹ میں ہوئی، اس کی وجہ حکام کو خفیہ ذرائع سے ملنے والی اطلاعات بنیں۔

کینیڈا: مندر میں ہندو عقیدت مندوں پر مبینہ خالصت‍ان حامیوں کا حملہ

پیلی بھٹ کے پولیس سپرنٹنڈنٹ اویناش پانڈے نے صحافیوں کو بتایا کہ یہ تینوں عسکریت پسند بھارتی ریاست پنجاب میں اسی مہینے کیے جانے والے ایک گرینیڈ حملے میں مبینہ طور پر ملوث ہونے کی وجہ سے پولیس کو مطلوب تھے۔

اویناش پانڈے نے کہا، ''خفیہ ذرائع سے ملنے والی ایک اطلاع کے بعد پولیس نے ان عسکریت پسندوں کو گھیرے میں لے لیا تھا، جس کے بعد انہوں نے پولیس پر بھاری ہتھیاروں سے فائرنگ شروع کر دی تھی۔ یہ تینوں پولیس کی جوابی کارروائی میں شدید زخمی ہو گئے تھے اور بعد ازاں انہوں نے ایک مقامی ہسپتال میں دم توڑ دیا۔‘‘

بھارت کا بشنوئی گینگ، جس کی کارروائیاں کینیڈا تک پھیل گئیں

پیلی بھٹ پولیس کے سربراہ نے دعویٰ کیا کہ پولیس کو ان عسکریت پسندوں کے قبضے سے دو خودکار رائفلیں، دو پستول اور کافی زیادہ بارودی مواد بھی ملا۔

پنجاب پولیس کے سربراہ کا موقف

بھارتی ریاست پنجاب کے پولیس سربراہ گورو یادیو نے ان تین ہلاکتوں کے حوالے سے پیر ہی کے روز جاری کردہ ایک بیان میں کہا کہ مرنے والے تینوں عسکریت پسندوں کا تعلق خالصتان زندہ باد فورس نامی ممنوعہ عسکریت پسند گروپ سے تھا۔

بھارت میں سکھوں کے ایک علیحدہ وطن خالصتان کے قیام کی جدوجہد کا سلسلہ ماضی میں بھارت کی 1947ء میں برطانوی راج سے آزادی تک جاتا ہے۔ اسی تحریک کو بھارت میں وزیر اعظم اندرا گاندھی کے قتل اور پھر ایک مسافر طیارے پر بم حملے کی وجہ بھی قرار دیا جاتا ہے۔

یہی خالصتان تحریک بھارت اور ان کئی مغربی ممالک کے مابین بہت زیادہ تلخی پیدا کرنے والا موضوع بھی رہی ہے،  جن کی قومی آبادیوں میں سکھوں کی تعداد کافی زیادہ ہے۔

'ریاست خالصتان کا خواب جرم نہیں ہے'، بھارتی رکن پارلیمان امرت پال

نئی دہلی حکومت کا مطالبہ رہا ہے کہ مغربی ممالک خالصتان تحریک کے خلاف سخت کارروائی کریں، جس کے سرکردہ رہنماؤں پر بھارت کی طرف سے دہشت گردی کے الزامات بھی لگائے جاتے ہیں۔

بھارت میں خالصتان تحریک پر طویل عرصے سے قانوناﹰ پابندی ہے۔

م م / ر ب (اے ایف پی)