CBN zai samar da eNaira a Najeriya

Kudin na eNaira da ake shirin kaddamar wa a Najeriyar dai, nau'i ne na kudin Crypto da yake tashe a duniya. Babban bankin Najeriyar dai tuni har ya kadammar da shafin internet na kudin da aka yi wa lakabi da eNaira, inda daukacin hada-hadar da za a rinka yi ta saye da sayarwa za ta kasance ta kafar intanet. An bullo da wannan nau'in kudi ne a daidai lokacin da Najeriyar ke kara kaimi wajen amfani da internet domin hada-hadar kudi da nufin rage yawo da su a hannu. Babban bankin Najeriyar wato CBN dai, ya bayyana cewa kudin internet na eNaira ba wai zai maye gurbin takardar kudi ta Naira ba ne.

Sai dai ya nunar da cewa eNaira, za ta zama amintaciyyar hanya ta hada-hadar kudi a fannin saye da sayarwa da ma rike darajar kudin. Amfana ta fannin samun riba domin rage radadin koma bayan tattalin arziki ne kan gaba a zukattan 'yan Najeriya a kan wannan nau'in kudin Naira na intanet da ake shirin kadamarwa a ranar daya ga watan Oktoba da ta zo daidai da ranar bikin cikar Najeriya shekaru 61 da samun 'yanci. Najeriyar dai ta bullo da wannan kudi na internet na eNaira bayan haramta hada-hadar irinsa na Crypto a kasar, a yanayi mai kama da ta yi amai ta lashe. Tuni kwararru ke kashedin babban banki ya bi a hankali, saboda akwai kalubale a gaba.