1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
Siasa

Viongozi wa dunia wapongeza Assad kuondolewa madarakani

Amina Abubakar
8 Desemba 2024

Viongozi mbali mbali wa dunia wameendelea kutoa hisia zao, baada ya waasi nchini Syria kutangaza kuuangusha utawala wa Bashar Al Assad na kumaliza miaka 50 ya utawala wa kiimla kutoka kwa familia ya kiongozi huyo.

https://p.dw.com/p/4ntMZ
Waziri wa mambo ya nchi za nje wa Ujerumani Annalena Baerbock
Waziri wa mambo ya nchi za nje wa Ujerumani Annalena BaerbockPicha: Sebastian Gollnow/dpa/picture-alliance

Waziri wa mambo ya nchi za nje wa Ujerumani Annalena Baerbock amesema kwa sasa Syria haitakiwi kuanguka katika mikono ya makundi mengine yaliyo na itikadi kali. Amehimiza ulinzi kamili wa makundi ya kidini na makabila ya wachache kama ya Wakurdi na Wakristo.

Naibu Waziri Mkuu wa Uingereza Angela Rayner, amesema kile kinachohitajika kwa sasa ni uthabiti wa kikanda akisema udikteta na ugaidi umesababisha madhila makubwa kwa watu wa Syria.

Waasi wa Syria waingia Damascus, wasema Assad amekimbia

Mjumbe maalum wa Umoja wa Mataifa kwa Syria Geir Pedersen pia amezungumzia hali ya Syria na kusema ukurasa mpya umefunguliwa nchini humo na anatumai utakuwa wa amani, maridhiano, uadilifu na unaowajumuisha Wasyria wote. 

Rais wa Marekani Joe Biden kupitia msemaji wa usalama wa kitaifa Sean Savett,  amesema Marekani inafuatilia matukio ya Syria kwa karibu, huku Ufaransa ikisema itaendelea kusimamia usalama wa kanda nzima na kuitakia Syria amani umoja na uhuru. 

China pia imesema inafuatilia kwa karibu hali nchini Syria.