شام پر اسرائیلی فضائی حملے لازمی بند ہونے چاہئیں،اقوام متحدہ

رواں ماہ کے اوائل میں شام میں باغیوں کے ہاتھوں صدر بشارالاسد کے اقتدار کے خاتمے کے بعد سے اسرائیل نے اس ملک پر سینکڑوں فضائی حملے کیے ہیں جن کا مقصد، اس کے بقول، اسٹریٹجک ہتھیاروں اور فوجی ڈھانچوں کو تباہ کرنا ہے۔

شام ميں آزاد و شفاف انتخابات ضروری ہيں، اقوام متحدہ

گوٹیرش نے نامہ نگاروں سے بات کرتے ہوئے کہا، "شام کی خودمختاری، علاقائی یک جہتی اور سالمیت کو مکمل طور پر بحال کیا جانا چاہیے اور جارحیت پر مبنی تمام کارروائیوں کا فوری خاتمہ ہونا چاہیے۔"

اسرائیلی فوجی اسرائیل مقبوضہ گولان کی پہاڑیوں اور شام کے درمیان واقع اس علاقے میں داخل ہو گئے ہیں، جسے 1973 کی عرب اسرائیل جنگ کے بعد ایک معاہدے کے تحت غیر فوجی علاقہ قرار دیا گیا تھا۔ اور جہاں اقوام متحدہ کے امن فوجی گشت کے لیے تعینات تھے۔

شام میں غیرملکی سفارتی سرگرمیوں میں تیزی

اسرائیلی حکام نے اس اقدام کو اسرائیل کی سرحدوں کی حفاظت کو یقینی بنانے کے لیے محدود اور عارضی قرار دیا ہے لیکن اس بارے میں کوئی اشارہ نہیں دیا کہ فوجیوں کو کب واپس بلایا جائے گا۔

امید اور تاریخ کا لمحہ

گوٹیرش کا کہنا تھا "مجھے یہ واضح کرنے دیں کہ دونوں ملکوں کو ایک دوسرے سے الگ کرنے والے علاقے میں اقوام متحدہ کے امن دستوں کے علاوہ کوئی اور فوجی موجود نہیں ہونے چاہئیں۔ یہ حتمی بات ہے۔ اسرائیل اور شام کے درمیان جنگ کے خاتمے کے 1974 کے معاہدے کی شرائط کو برقرار رہنا چاہئیے جو مکمل طور پر نافذ العمل ہیں۔"

اسرائیلی فوج کو گولان کی مقبوضہ پہاڑیوں پر رہنے کا حکم

انہوں نے مزید کہا کہ اقوام متحدہ کی توجہ شام میں جامع، قابل اعتماد اور پرامن سیاسی منتقلی اور دنیا کے سب سے بڑے انسانی بحران سے نمٹنے کے لیے امداد کے حصول پر مرکوز ہے۔

اقوام متحدہ کے سیکرٹری جنرل نے کہا، "یہ ایک فیصلہ کن لمحہ ہے - امید اور تاریخ کا لمحہ ہے، لیکن یہ ایک بڑی غیر یقینی صورتحال بھی ہے۔"

گوٹیرش کا کہنا تھا، "کچھ کردار اپنے مقاصد کے لیے اس صورت حال سے فائدہ اٹھانے کی کوشش کر سکتے ہیں۔"

شامی عوام کا ساتھ دینا بین الاقوامی برادری کی ذمہ داری

گوٹیرش نے کہا،"یہ بین الاقوامی برادری کی ذمہ داری ہے کہ وہ شام کے لوگوں کے ساتھ کھڑے ہوں جنہوں نے بہت زیادہ نقصان اٹھایا ہے۔ شام کے مستقبل کی صورت گری ہم سب کے تعاون سے، اس کے عوام کے ذریعے، اس کے لوگوں کے لیے ہونی چاہیے۔"

اقوام متحدہ کے سیکرٹری جنرل نے میکسیکو کی ایک وکیل کارلا قنتانا کو شام میں لاپتہ افراد سے متعلق ایک آزاد ادارے کا سربراہ نامزد کیا اور کہا کہ ان کی ٹیم کو اپنے مینڈیٹ پر مکمل طور پر کام کرنے کی اجازت ہونی چاہئیے۔

اقوام متحدہ کی جنرل اسمبلی نے 2023 میں یہ ادارہ قائم کیا تھا جس کا مقصد یہ جاننا تھا کہ شام میں لاپتہ ہونے والے افراد کے ساتھ کیا ہوا۔ اس کے ساتھ  ہی متاثرین، زندہ بچ جانے والوں اور ان کے خاندانوں کی مدد کرنا اس کے کام میں شامل تھا۔

دی ہیگ میں قائم لاپتہ افراد سے متعلق بین الاقوامی کمیشن نے کہا ہے کہ اسے موصولہ اعداد و شمار کے مطابق شام میں 66 تک غیر تصدیق شدہ اجتماعی قبریں موجود ہیں۔ اس کا کہنا ہے کہ شام کے نیٹ ورک فار ہیومن رائٹس سمیت بین الاقوامی اور شامی تنظیموں کے مطابق وہاں ڈیڑھ لاکھ سے زیادہ افراد لاپتہ ہیں۔

شام میں 2011 میں جمہوریت نواز پرامن مظاہرین کے خلاف اسد حکومت کی جانب سے پر تشدد کارروائیوں کے نتیجے میں خانہ جنگی کا آغاز ہوا، جس کے بعد لاکھوں افراد کو بیرون ملک فرار ہونا پڑا جبکہ مزید لاکھوں اپنے ہی ملک میں بے گھر ہو گئے۔

ج ا ⁄  ص ز (روئٹر‍ز)