Nijar: Shirin zaben gama-gari

A ranar 21 ga watan Febrairu na 2016 ne za a gudanar da zabukan shugaban kasa da na 'yan majalisun dokoki a Jamhuriyar Nijar, wanda kotun tsarin mulkin kasar ta amince da takardun 'yan takara 15 daga cikin 16 da aka gabatar a gabanta. Hakan ya nunar cewa 'yan takara 15 ne za su fafata a zaben na shugaban kasa. Sai dai kuma daya daga cikinsu Hama Amadou na jam'iyyar Moden FA Lumana Afrika, na ci gaba da zama a gidan yari na garin Fillingue da ke a nisan kilomita kusan 200 da Yamai babban birnin kasar.